2018 جىلدىڭ 5 اقپانىندا جازا مەرزىمى اياقتالدى. 2014 جىلى مەشىمباەۆا 7 جىلعا باس بوستاندىعىنان ايىرىلعان ەدى. ال استانانىڭ قىلمىستىق ىستەر جونىندەگى سوتىنىڭ اپەللياتسيالىق القاسى ەكس-شەنەۋنىككە قاتىستى جازا مەرزىمىن وزگەرىسسىز قالدىرعاندىقتان، ول الماتى وبلىسىنداعى جالپى تارتىپتەگى كولونياعا كەزەڭدەلگەن ەدى. ءبىر جىل جانە بەس اي ۋاقىتتا انار مەشىمباەۆا الماتى وبلىسىنداعى قونىس كولونياسىندا بولدى. سويتسەك، 2015 جىلى پرەزيدەنت نۇرسۇلتان نازارباەۆتىڭ 2015 جىلعى راقىمشىلىق تۋرالى جارلىعىمەن انار مەشىمباەۆانىڭ جازاسى ەكى ەسەگە ازايعان ەكەن.
ەسكە سالايىق، 2014 جىلدىڭ 14 ناۋرىزىندا استاناداعى ەسىل اۋداندىق №2 cوتى سۋدياسىنىڭ شەشىمىمەن ستاتيستيكا اگەنتتىگىنىڭ بۇرىنعى باسشىسىنا مۇلكىن تاركىلەۋمەن جانە مەملەكەتتىك قىزمەت لاۋازىمىن اتقارۋ قۇقىعىنان بەس جىل مەرزىمگە ايىرۋمەن بىرگە جالپى رەجيمدەگى كولونيادا جەتى جىل جازا وتەۋ ۇكىمى شىعارىلعان ەدى.سوت مەشىمباەۆانى قر قىلمىستىق كودەكسىنىڭ "جىمقىرۋ" جانە "قىزمەتتىك وكىلەتتىكتى تەرىس پايدالانۋ" باپتارى بويىنشا ايىپتى دەپ تانىدى.
مەشىمباەۆاعا قاتىستى قىلمىستىق ءىس 2010 جىلدىڭ قاڭتارىندا قوزعالعان بولاتىن. ول ۇلتتىق حالىق ساناعىن وتكىزۋگە بولىنگەن 700 ميلليون تەڭگەدەن استام قارجىنى جىمقىردى دەپ ايىپتالدى. كەيىن ستاتيستيكا اگەنتتىگىنىڭ ەكس-باسشىسىنا حالىقارالىق ىزدەۋ جاريالاندى. 2013 جىلدىڭ قىركۇيەگىندە ول ماسكەۋدەن ەكستراديتسيالاندى.
tengrinews.kz
