اتىراۋدا جەر ءۇيدىڭ جىلىتۋ قازاندىعى جارىلىپ، ءۇش ستۋدەنت ولىم اۋزىنان قالدى. اپاتتان زارداپ شەككەن 19 جاستاعى ەكى جىگىتتىڭ ءحالى مۇشكىل. دەنەسىنىڭ 95 پايىزىن كۇيىك شالعان. 22 جاستاعى بويجەتكەننىڭ دە جاعدايى ناشار. بۇل تۋرالى “ادىرنا” ۇلتتىق پورتالى كتك تەلەارناسىنا سىلتەمە جاساپ حابارلايدى.
جويقىن جارىلىستان باسپانانىڭ تۇگى قالماي جانىپ كەتكەن. تەك ءتورت قابىرعاسى قالعان. ءۇش ستۋدەنتتى قىزىل جالىننان كورشىلەرى قۇتقارىپ قالعان.
«بالاۋسا» ىقشاماۋدانى تۇرعىندارىنىڭ ءتۇن تىنىشتىعىن گۇرس ەتكەن داۋىس بۇزدى. جەر ۇيلەردىڭ بىرىندە جىلىتۋ قازاندىعى جارىلىپ، باسپانا ورتكە ورانعان. وقيعا ورنىنا جينالعان جۇرت ورتەنىپ جاتقان ءۇيدىڭ ىشىندەگى ستۋدەنتتەردى قۇتقارىپ قالعان.
تۇنگى ساعات ءبىر شاماسىندا جىلىتۋ قازاندىعى گۇرس ەتىپ جارىلعان. جويقىن جارىلىستىڭ دىبىسىن ەستىگەندەردىڭ ايتۋىنشا، ءۇيدىڭ توبەسى بىردەن كوككە ۇشىپتى.
زارە-قۇتى قالماعان كورشى جىگىتتەر قاۋمالاپ ءجۇرىپ جالىن قۇشاعىندا قالعان ءۇش ستۋدەنتتى سىرتقا شىعارىپ العان. كەيىن تاعى دا كىشىگىرىم جارىلىس بولعان. جارتى ساعات ءوتىپ ءورت كۇشەيگەن كەزدە توتەنشەلىكتەر كەلىپ، قىزىل جالىندى سوندىرگەن. ءۇيدىڭ 120 شارشى مەترى تۇگى قالماي جانىپ كەتكەن. ءتۇن ورتاسىندا ءورتتى سوندىرۋگە 16 قىزمەتكەر مەن 3 تەحنيكا جۇمىلدىرىلىپتى. ءۇش ستۋدەنت كورشى-قولاڭنىڭ ارقاسىندا ءتىرى قالعان.
اتىراۋ قالاسىنىڭ تۇرعىنى ەسەنقوس قويشىباەۆ:
«توسەنىشتى كورشىلەر بەردىك. كورپەلەردى سۋلاپ اكەلدىك. سوعان سالىپ جاتقىزدىق. جارتى ساعات، 45 مينۋت دەگەندە ءبىرىنشى جەدەل جاردەم كەلدى. سودان كەيىن ەكىنشىسى كەلدى. ءۇشىنشى تاعى كەلدى. ولار دا كۇيگەن ادامداردى ءبىر-بىرلەپ الىپ كەتتى. جارتى ساعاتتان كەيىن ءورت ءسوندىرۋ قىزمەتى كەلە باستادى»، – دەيدى.
كۇلگە اينالعان شاڭىراقتىڭ يەسى الماتىدا تۇرادى. بوس تۇرعان ءۇيدى ۋاقىتشا تۋىستارىنا تابىستاپ كەتكەن.
اتىراۋ قالاسىنىڭ تۇرعىنى ءومىرلان تاستانوۆ:
«جەزدەمنىڭ ءۇيى. بۇل جاعدايدى تاڭەرتەڭ ەستىدىك. ولار الماتىعا كوشىپ كەتكەن. بۇل ءۇي يەسىز قالماسىن دەپ جاتقىزىپ تۇر عوي»، – دەيدى.
دارىگەرلەردىڭ ايتۋىنشا، جىلۋ قازاندىعى جارىلعان كەزدە زارداپ شەككەن 2002 جىلعى ەكى بوزبالانىڭ جاعدايى وتە اۋىر. ال 22 جاستاعى قىز بالانىڭ دەنساۋلىعى ءبىرشاما ءتاۋىر.
اتىراۋ وبلىى اۋرۋحاناسىنىڭ ءبولىم مەڭگەرۋشىسى بەكەن قۇلنيازوۆ:
«1999 جىلعى قىز بالا جاراقات بولىمىندە جاتىر. دەنەسىنىڭ 35 پايىزىن كۇيىك شالعان. ءبىرىنشى، ەكىنشى دارەجەدە. ول كىسىنىڭ جاعدايى قالىپتى اۋىر جاعدايدا»، – دەدى.
جارىلىستىڭ سەبەبى انىقتالىپ جاتىر.
“ادىرنا” ۇلتتىق پورتالى
