ەلىمىزدەگى بارلىق نازارباەۆ زياتكەرلىك مەكتەپتەرىندە «تۋعان ەلگە تاعزىم» ولكەتانۋ-زەرتتەۋ ەكسپەديتسياسى جۇمىسىن باستادى. تالدىقورعاندىق نزم وقۋشىلارى الماتى وبلىسىنىڭ تاريحي ورىندارىمەن تانىستى.
العاشقى زەرتتەۋ نىسانى 17 عاسىرداعى «تەكەلى ستەلا» بۋددا ەسكەرتكىشى بولدى. قاتىسۋشىلار قازاقستانداعى ءبۋدديزمنىڭ تارالۋ تاريحىمەن تانىستى. سونداي-اق ولار جوڭعار الاتاۋىنىڭ ۇزىندىعى 70 شاقىرىمعا جۋىق «قورا» شاتقالىندا دا زەرتتەۋلەر جۇرگىزدى.
9-سىنىپ وقۋشىسى دانيارقىزى جانيا «تەڭىز شىرعاناعىنىڭ قورشاعان ورتاعا پايداسى» دەگەن تاقىرىپتا زەرتتەۋ جۇمىسىن باستادى. جانيە الماتى وبلىسىندا وسەتىن تەڭىز شىرعاناقتارىنىڭ تۇرلىك قۇرامىن انىقتاپ، ونىڭ بيولوگيالىق قاسيەتتەرىن زەرتتەۋگە دە كىرىستى.
سونىمەن قاتار تەكەلى قالاسىنىڭ الما باعىن دا ارالادى. جەتىسۋدىڭ سەناپ، ۆوسحود، زولوتوە پرەۆوسحودستۆو، لازارەۆسكوە، كۆينتي سياقتى باعالى سورتتارىنىڭ شىعۋ تاريحىمەن تانىستى.
الماتى وبلىسى كاسىپكەرلەر پالاتاسى جانىنداعى كاسىپكەرلەرگە قىزمەت كورسەتۋ ورتالىعىندا بيزنەس قۇرۋ جانە ءوز يدەيالارىن جۇزەگە اسىرۋ جولدارىن ۇيرەندى. جانە دە كاسىپكەرلىك نەگىزدەرى بويىنشا بيزنەس-ترەنينگتەن وتۋگە مۇمكىندىك الدى.
ءلاززات التىنبەكوۆا، الماگۇل شەگەقىزى جانە ارداق سۇرانشىقىزىنا العىسىمدى بىلدىرەمىن. ويتكەنى ولار مەنى كاسىپكەر بولۋعا شابىتتاندىرىپ قانا قويماي، قولداۋ كورسەتۋگە دايىن ەكەندىكتەرىن دە كورسەتتى، – دەيدى سۇحباتىندا تالدىقورعان نزم 11-سىنىپ وقۋشىسى ايبولات قاجىاقپار.
«تۋعان ەلگە تاعزىم» ولكەتانۋ ەكسپەديتسياسى ەلباسىنىڭ تۋعان اۋىلى شەمولعانعا دا بارىپ قايتتى.
«اتامەكەن» تاريحي-مادەني ورتالىعى، تۇڭعىش پرەزيدەنت مۇراجايىندا ەلباسىنىڭ ءومىربايانى تۋرالى، تاۋەلسىز قازاقستاننىڭ قالىپتاسۋ جولىنداعى اسا ماڭىزدى ساياسي جانە الەۋمەتتىك-ەكونوميكالىق وقيعالار تۋرالى مۇراعات ماتەريالدارىمەن تانىسىپ، ءبىلدى.
ەكسپەديتسيا «شارىن» ۇلتتىق تابيعي ساياباعى، «قايىڭدى»، «كولساي» كولدەرىنە ەكسكۋرسيامەن اياقتالدى.
«تۋعان ەلگە تاعزىم» جوباسى 2012 جىلدان بەرى جۇزەگە اسىرىلىپ كەلەدى. ەكسپەديتسياسى بارىسىندا نزم وقۋشىلارى جۇزدەگەن عىلىمي ەڭبەكتەرىن ۇسىنادى.
