الماتىدا SPA سالونىندا ينتيمدىك قىزمەت كورسەتكەن 15 جەڭىل ءجۇرىستى قىز ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
ءتارتىپ ساقشىلارى ءىس-شارانى كەشە تۇندە وتكىزدى. قالالىق كريمينالدىق پوليتسيانىڭ مالىمەتىنشە، نىسانداردىڭ ءبىرى ەليتالىق تۇرعىن ءۇي كەشەنىنە ورنالاستىرىلسا، تاعى ەكەۋى بوستاندىق جانە مەدەۋ اۋداندارىنىڭ اۋماعىنداعى ساياجايلاردا قىلمىستىق ارەكەتتەرىن ىسكە اسىرعان.
بۇل سالونداردا 15 جەڭىل ءجۇرىستى قىز كليەنتتەرگە ينتيمدىك قىزمەت كورسەتكەن. ولار – الماتى قالاسى، الماتى جانە جامبىل وبلىستارىنىڭ تۇرعىندارى.
ايەلدەر سوتتىلىعى بار-جوعىن انىقتاۋ ءۇشىن پوليتسياعا جەتكىزىلدى. ال عيماراتتاردىڭ يەلەرى جەزوكشەلىكپەن اينالىسۋ ءۇشىن سانالى تۇردە ءۇي-جايمەن قامتاماسىز ەتكەنى ءۇشىن، سونداي-اق جەڭگەتايلىق بويىنشا جاۋاپقا تارتىلدى. سونداي-اق، جەدەل ءبولىمنىڭ حابارلاۋىنشا، جىلدىڭ باسىنان بەرى الماتىلىق پوليتسەيلەر ادام ساۋداسىنا قاتىستى 28 قىلمىستى انىقتاعان. سونىمەن قاتار، ينتيمدىك قىزمەت كورسەتەتىن 73 جەزوكشە ءۇيى جويىلدى.
«ادىرنا» ۇلتتىق پورتالى
