"ديكي ارماننىڭ" قازاقستان بوكسىنا قانداي قاتىسى بار؟

2894
Adyrna.kz Telegram

الەۋمەتتىك جەلى قولدانۋشىلارى وسىلاي دەپ شۋلادى. قازاقستاندىق بوكسشىلارعا، ونىڭ ىشىندە وليمپياداشىلاردى الەم چەمپيوناتىنداعى جەكپە-جەكتە جاتتىقتىرۋشىلارى ەمەس، "ديكي ارمان" لاقاپ اتىمەن تانىمال كريمينالدىق اۆتوريتەت ارمان جۇماگەلديەۆتىڭ ءجون سىلتەپ جاتقانىنا نارازى بولدى دەپ حابارلايدى "ادىرنا" ۇلتتىق پورتالى "Sputnik قازاقستانعا" سىلتەمە جاساپ.

جەلىدە ديكي ارماننىڭ بوكسشى اسلانبەك شىمبەرگەنوۆكە: "ولسەڭ دە جەڭۋ كەرەك" دەپ رۋح بەرىپ جاتقان ۆيدەوسى پايدا بولدى. وسى ۋاقىتتا سپورتشىنىڭ جانىنان جاتتىقتىرۋشىسىن دا كورۋگە بولادى.

"سەن جاتتىقتىڭ عوي، ال قازىر كورسەت. سوڭىنا دەيىن، سوڭعى سەكۋندقا دەيىن بار قولىڭنان كەلگەنىن جاسا. ولسەڭ دە جەڭىسكە جەتەسىڭ! چەمپيونسىڭ عوي! قازاقسىڭ! قانە! ءبىز ساعان قولداۋ كورسەتەمىز!", - دەيدى جۇماگەلديەۆ سپورتشىعا. رەزونانستىق ۆيدەو الەۋمەتتىك جەلىلەردە تارالدى.

كوپشىلىك مۇنداي ادامنىڭ قازاقستاندىق بوكسقا ىقپالىن ايقىن كورسەتىپ وتىرعاندىعىنا نارازى بولدى.

"نە سەبەپتى ءبىزدىڭ سپورتشىلاردىڭ موتيۆاتسياسىمەن جاتتىقتىرۋشى نەمەسە پسيحولوگ ەمەس ديكي ارمان اينالىسادى. سپورت فەدەراتسياسى نە قاراپ وتىر سوندا؟ مۇمكىن ءبارىن تاراتىپ جىبەرىپ، كەلەسى وليمپياداعا قاتىسۋعا بوكسشىلارىمىزدىڭ وزدەرىن جىبەرەمىز؟ ناتيجە دە جاقسى بولادى، اقشانى دا ۇنەمدەپ قالامىز", - دەپ جازادى Facebook قولدانۋشىسى ءىلياس مىڭجاساروۆ.

"بۇل ۆيدەوعا مادەنيەت جانە سپورت مينيسترلىگىنىڭ رەسمي وكىلى قالاي تۇسىنىكتەمە بەرەدى؟ نەمەسە بۇل رۋحاني جاڭعىرۋ باعدارلاماسى ما؟"- دەپ جەلى قولدانۋشىلارى تاڭ قالىستى.

ء"ىىم بازالارىندا ەسەپتە تۇرعان ادامعا قازاقستاننىڭ رەسمي سپورت دەلەگاتسياسىنىڭ ءسوزىن سويلەتىپ، اككرەديتاتسيادان وتكىزىپ، VIP بەيدج بەرگەن شەنەۋنىكتەردىڭ اقىل-ەسى دۇرىس پا؟" – دەپ اشىندى جەلى قولدانۋشىلارىنىڭ ءبىرى.

بۇل وقيعاعا قازاقستان بوكس فەدەراتسياسى پىكىر ءبىلدىردى. ولاردىڭ ايتۋىنشا، قازاقستان بوكس فەدەراتسياسى بوكسشىلاردى دايارلاۋ ايماعىنا كىمنىڭ كىرەتىنىنە جاۋاپ بەرمەيدى. ويتكەنى چەمپيونات قازاقستاندا ءوتىپ جاتقان جوق. سول سەبەپتى باسقا ادامدار ۇيىمداستىرۋ جاعىنا جاۋاپ بەرەدى.

"بۇل چەمپيونات قازاقستاندا ەمەس، سەربيادا وتكەندىكتەن، ءبىز ۇيىمداستىرۋعا، سونداي-اق بەلگىلى ءبىر ادامداردىڭ سپورتشىلار شىعاتىن نەمەسە جاتتىقتىرىلاتىن ايماققا وتۋىنە جاۋاپتى ەمەسپىز. مۇنىمەن قابىلداۋشى تاراپ اينالىسادى. ءبىزدىڭ مىندەتىمىز - بوكسشىلاردىڭ جاقسى ناتيجەگە قول جەتكىزۋىن، وزدەرىن جاقسى سەزىنۋىن، باسپاناعا جانە تاماققا بايلانىستى ماسەلەلەرىنىڭ بولماۋىن قامتاماسىز ەتۋ", - دەپ جاۋاپ بەردى ۇيىمنىڭ ءباسپاسوز حاتشىسى ايان تولەگەن.

ارمان جۇماگەلديەۆ كۇزەتتەن قالاي وتكەنىنە فەدەراتسيادا جاۋاپ بەرە المادى. بىراق چەمپيوناتقا ونىڭ قازاقستان قۇراماسىنىڭ جانكۇيەرى رەتىندە بارعانىن، بوكس جانكۇيەرلەرىنىڭ ارقايسىسىن فيزيكالىق تۇرعىدان باقىلاي المايتىندارىن جەتكىزدى.

"چەمپيوناتقا كوپتەگەن قازاقستاندىق جانكۇيەرلەر باردى. بىز ولاردىڭ نەمەن اينالىسىپ، قانداي ارەكەت جاسايتىنىن باقىلاي المايمىز. شىنىمدى ايتسام، ءبىز ونىمەن اينالىسپاۋىمىز كەرەك", - دەدى قبف وكىلى.

ايتا كەتەيىك، سەربيا استاناسى بەلگرادتا بوكستان اۋەسقويلار اراسىندا 21-ءشى الەم چەمپيوناتى وتۋدە. جارىس 24 قازاندا باستالىپ، 6 قاراشاعا دەيىن جالعاسادى. 

 

"ادىرنا" ۇلتتىق پورتالى.

 

پىكىرلەر