پەنجىم مەكتەبىندەگى توبەلەستەن سوڭ اۋرۋحاناعا تۇسكەن ءجاسوسپىرىمنىڭ اناسى «بالام تولىق جازىلمايىنشا، كەشىرىم بەرمەيمىن» دەگەن مالىمدەمە جاسادى، دەپ حابارلايدى «ادىرنا» ءتىلشىسى كتك تەلەارناسىنا سىلتەمە جاساپ.
كەشە جانساقتاۋ بولىمىندە جاتقان 16 جاستاعى جەتكىنشەكتىڭ جاعدايى وڭالىپ، جالپى پالاتاعا اۋىستىرىلدى. ارنايى قۇرىلعان شتاب اۋىلدا ءتۇسىندىرۋ جۇمىسىنا قىزۋ كىرىسكەن. كۇلشاش سەرىكباەۆا ەكى كۇننەن بەرى اۋرۋحانانىڭ الدىن تورىپ ءجۇر. ۇلى نۇربولدىڭ باسىنا وتا جاسالعاندا ءوزىن قويارعا جەر تاپپادى. بەس بالانىڭ كەنجەسى مۇنداي توبەلەستەرگە وسىعان دەيىن قاتىسپاعان دەيدى اناسى.
«مۇنداي توبەلەسكە قاتىسىپ كورگەن ەمەس. كوپشىلىكتىڭ اراسىنا قالاي كىرىپ كەتكەن؟ ەكى جاق ءبىر-بىرىمىزبەن تاتۋلاستىق. ولارعا وكپەم جوق. بىراق بالام اياعىنان تىك تۇرىپ، قالپىنا كەلگەنشە، مەن ەشكىمگە كەشىرىم بەرمەيمىن. بالام اياعىنان تۇرسىن. ودان كەيىنگى ەمى قالاي بولادى؟ سونى كورەمىن. باسىنا وتا جاسالىپ، پلاستماسس سالىنىپ جاتىر..»–دەدى جابىرلەنۋشىنىڭ اناسى.
قازىرگى تاڭدا 10-سىنىپ وقۋشىسى نۇربولدىڭ بەتى بەرى قاراعان. اق حالاتتىلار سوققىدان ۇيىپ قالعان قاندى باسىن ءتىلىپ شىعاردى. جانساقتاۋ بولىمىنەن جالپى پالاتاعا اۋىستىرىلۋى جاقىندارىنىڭ كوڭىلىنە مەدەۋ بولىپ وتىر.
«بۇگىن جالپى تەكسەرىس بولىپ، جاعدايىنىڭ ءبىر قالىپقا كەلگەنىن ەسكەردىك. جاراقاتتى ەمدەيتىن بولىمگە اۋىستىرىلدى. ەسىن انىق بىلەدى. تاماقتى ءوزى ءىشىپ جاتىر. جالپى مۇنداي ناۋقاس كەمىندە ەكى اپتا جاتۋى كەرەك. قانشا دەگەنمەن وتا بولدى. ميى شايقالدى، سوعىلۋ بەلگىلەرى بار. سوندان كەيىن ۇيىنە شىعارىلادى. ۇيىنە شىققان سوڭ قالپىنا كەلتىرۋ ەمى كەزەڭ-كەزەڭىمەن بولادى»،– دەدى پانفيلوۆ اۋدانى اۋرۋحاناسىنىڭ باس دارىگەرىنىڭ ورىنباسارى ەربولات بەگەمبەكوۆ.
پەنجىمدەگى وقۋشىلار توبەلەسىنەن سوڭ كەشە قۇرىلعان شتابتىڭ جۇمىسى جانداندى. اۋىلداعى مىڭنان استام بالا وقيتىن جالعىز مەكتەپتە ءتۇسىندىرۋ جۇمىسى قىزۋ ءجۇرىپ جاتىر. اۋىلداعى ءتارتىپ پوليتسيا باقىلاۋىندا.
«ادىرنا» ۇلتتىق پورتالى
