Penjim mektebindegi tóbelesten soń aýrýhanaǵa túsken jasóspirimniń anasy «balam tolyq jazylmaıynsha, keshirim bermeımin» degen málimdeme jasady, dep habarlaıdy «Adyrna» tilshisi KTK telearnasyna silteme jasap.
Keshe jansaqtaý bóliminde jatqan 16 jastaǵy jetkinshektiń jaǵdaıy ońalyp, jalpy palataǵa aýystyryldy. Arnaıy qurylǵan shtab aýylda túsindirý jumysyna qyzý kirisken. Kúlshash Serikbaeva eki kúnnen beri aýrýhananyń aldyn toryp júr. Uly Nurboldyń basyna ota jasalǵanda ózin qoıarǵa jer tappady. Bes balanyń kenjesi mundaı tóbelesterge osyǵan deıin qatyspaǵan deıdi anasy.
«Mundaı tóbeleske qatysyp kórgen emes. Kópshiliktiń arasyna qalaı kirip ketken? Eki jaq bir-birimizben tatýlastyq. Olarǵa ókpem joq. Biraq balam aıaǵynan tik turyp, qalpyna kelgenshe, men eshkimge keshirim bermeımin. Balam aıaǵynan tursyn. Odan keıingi emi qalaı bolady? Sony kóremin. Basyna ota jasalyp, plastmass salynyp jatyr..»–dedi jábirlenýshiniń anasy.
Qazirgi tańda 10-synyp oqýshysy Nurboldyń beti beri qaraǵan. Aq halattylar soqqydan uıyp qalǵan qandy basyn tilip shyǵardy. Jansaqtaý bóliminen jalpy palataǵa aýystyrylýy jaqyndarynyń kóńiline medeý bolyp otyr.
«Búgin jalpy tekseris bolyp, jaǵdaıynyń bir qalypqa kelgenin eskerdik. Jaraqatty emdeıtin bólimge aýystyryldy. Esin anyq biledi. Tamaqty ózi iship jatyr. Jalpy mundaı naýqas keminde eki apta jatýy kerek. Qansha degenmen ota boldy. Mıy shaıqaldy, soǵylý belgileri bar. Sondan keıin úıine shyǵarylady. Úıine shyqqan soń qalpyna keltirý emi kezeń-kezeńimen bolady»,– dedi Panfılov aýdany aýrýhanasynyń bas dárigeriniń orynbasary Erbolat Begembekov.
Penjimdegi oqýshylar tóbelesinen soń keshe qurylǵan shtabtyń jumysy jandandy. Aýyldaǵy myńnan astam bala oqıtyn jalǵyz mektepte túsindirý jumysy qyzý júrip jatyr. Aýyldaǵy tártip polıııa baqylaýynda.
«Adyrna» ulttyq portaly
