«Nur Otan» پارتياسى جانىنداعى ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەستىڭ كەزەكتى وتىرىسىندا پەداگوگ مامانداردى دايىنداۋ، ءبىلىم بەرۋ باعدارلامالارىنىڭ مازمۇنى جانە جاڭا مەكتەپتەر سالۋ ماسەلەلەرى قارالدى.
ءبىلىم جانە عىلىم ءبىرىنشى ۆيتسە-ءمينيسترى شولپان كارينوۆانىڭ ايتۋىنشا، «پەداگوگ مارتەبەسى تۋرالى» زاڭ اياسىندا بۇگىنگى تاڭدا پەداگوگتەردىڭ ەڭبەكاقىسى لاۋازىمدىق جالاقىدان 30-دان 50%-عا دەيىن كوتەرىلىپ، سىنىپ جەتەكشىلىگى، تالىمگەرلىك، ماگيستر دارەجەسى، پاندەردى اعىلشىن تىلىندە وقىتۋ جانە ت. ب. ءۇشىن قوسىمشا اقى كولەمى ارتقان.
پارتيانىڭ سايلاۋالدى باعدارلاماسىن ىسكە اسىرۋ اياسىندا 2023 جىلعا قاراي پەداگوگتاردىڭ جالاقىسىن 2 ەسەگە ارتتىرۋ جوسپارلانۋدا. سونداي-اق، پەداگوگيكالىق ادەپ جانە پەداگوگتاردىڭ قۇقىقتارىن قورعاۋ ماسەلەلەرى بويىنشا ارنايى كەڭەستەر قۇرىلدى. ەسكە سالا كەتەيىك، بۇعان دەيىن «پەداگوگ مارتەبەسى تۋرالى» زاڭ جوباسى «Nur Otan» پارتياسى جانىنداعى قۇقىقتىق كەڭەستىڭ كەڭەيتىلگەن وتىرىسىندا قارالىپ، وندا ۇستازداردىڭ جۇمىس جاعدايىن جاقسارتۋ، ولاردىڭ قۇقىقتارىن رەتتەۋ، ءيميدجىن ارتتىرۋ جانە ءبىلىم مەن عىلىمنىڭ وزگە دە ءتۇيىندى ماسەلەلەرىن شەشۋ جايى كوتەرىلگەن بولاتىن.
وتىرىس بارىسىندا اتالعان ماسەلەلەردى شەشۋدە وڭ وزگەرىستەر بايقالعانىمەن، وڭىرلەردە ءبىلىم بەرۋ سالاسىنىڭ ساپاسىن ارتتىرۋعا قاتىستى شارالاردى جۇزەگە اسىرۋدا باسى اشىق سۇراقتار بار ەكەنى ايتىلدى.
قوعامدىق كەڭەس توراعاسى جۇلدىز سۇلەيمەنوۆا نۇر-سۇلتان قالاسىندا وسى جىلدىڭ سوڭىنا دەيىن پايدالانۋعا بەرۋ جوسپارلانعان مەكتەپتەر قۇرىلىسىنىڭ ۋاقىتىندا اياقتالماۋى مۇمكىن ەكەنىن العا تارتتى. ماسەلەن، ۇلى دالا داڭعىلى مەن 39 كوشە قيىلىسىنداعى نىساننىڭ قۇرىلىسى مۇلدەم توقتاپ تۇر. تاعى 4 مەكتەپتىڭ قۇرىلىسى مەرزىمىنەن كەشىگۋدە. وسىعان بايلانىستى جۇلدىز سۇلەيمەنوۆا نۇر-سۇلتان قالاسى ءبىلىم باسقارماسىنىڭ باسشىسى شاكارىم سەيسەنبايعا قاتاڭ ەسكەرتۋ جاسادى.
«نۇر-سۇلتان قالاسىندا وقۋشى ورىندارىنىڭ جەتىسپەۋشىلىگى بار. پەداگوگتاردىڭ تاپشىلىعى دا – كۇن تارتىبىنەن تۇسپەي تۇرعان ماسەلە، 700-دەن استام پەداگوگ جەتىسپەيدى. ءسىزدىڭ تاراپىڭىزدان ماسەلەنى ساپالى شەشۋ ءۇشىن ەشقانداي شارا قولعا الىنباعان»،- دەپ اتاپ ءوتتى كەڭەس توراعاسى.
«ادىرنا» ۇلتتىق پورتالى
