25 قازاندا قر پرەزيدەنتى قاسىم-جومارت توقاەۆتىڭ تۇركىمەنستانعا ساپارى اياسىندا "مير" تەلەارناسى وسى ەلدەگى ەتنيكالىق قازاقتاردىڭ باقىتتى ءومىرى تۋرالى رەپورتاج جاسادى دەپ حابارلايدى "ادىرنا" ۇلتتىق پورتالى "Turkmen.News-كە" سىلتەمە جاساپ.
رەپورتاج بارىسىندا بۇگىندە تۇركىمەنستاندا مىڭداعان قازاق وتباسى تۇراتىنى، ولاردىڭ كوپشىلىگى ءبىر ەمەس، بىرنەشە ۇرپاق بويى قالىپتاسقانىن، ويتكەنى ولارعا بۇل ەلدە بارلىق جاعداي جاسالعانى ايتىلادى.
رەپورتاجدا جاس كەزىندە اشحابادقا كوشىپ كەلگەن ەگدە ايەلدىڭ وتباسى كورسەتىلەدى. ول ءوزىنىڭ ۇرپاقتارىنىڭ بارلىعى باقىتتى ءومىر ءسۇرىپ جاتقانىن جانە تۇركىمەنستاندا قالعىسى كەلەتىنىن ايتادى. باعدارلامادا وتباسى مۇشەلەرى قازاقتىڭ ۇلتتىق اندەرىن شىرقاپ، باس كيىمدەردى كەستەلەۋ، ەت تاعامىن جاساۋ ونەرىن پاش ەتەدى.
"Turkmen.News-ءتىڭ" حابارلاۋىنشا، بۇل رەپورتاج تەك وسى ارنادا كورسەتىلگەن. ال تۇركىمەنستاننىڭ تەلەارنالارىندا ق.توقاەۆتىڭ ساپارىنىڭ قۇرمەتىنە دە قازاق ۇلتىنىڭ ءومىر ءسۇرۋ فاكتىسى دە ايتىلماعان. نەگىزىنەن، تۇركىمەنستاندا ەتنيكالىق قازاقتاردىڭ تۇراتىنى "Turkmenistan Today" مەملەكەتتىك اقپارات اگەنتتىگىنىڭ كوپتەگەن حابارلارىندا ايتىلمايدى.
"شىندىعىندا، تۇركىمەنستانداعى باسقا ۇلتتار سياقتى قازاقتاردىڭ دا جاعدايى كەرەمەت ەمەس. ەكونوميكالىق داعدارىستان، جۇمىسسىزدىقتان، ازىق-تۇلىك تاپشىلىعىنان جانە ادام قۇقىقتارىنىڭ بۇزىلۋىنان مۇنداعى وزگە ۇلتتار كوبىنەسە تۇرىكمەندەرگە قاراعاندا كوبىرەك زارداپ شەگەدى", - دەپ جازادى "Turkmen.News".
"تۇركىمەنستاندا تۇرىكمەن تىلىنەن باسقا تىلدەردە وقىتاتىن مەكتەپتەر مۇلدەم جوق. سوندىقتان مۇنداعى سانى از ۇلت وكىلدەرى ءوز وتاندارىنا جاپپاي قونىس اۋدارۋدا. ماسەلەن، بيىلعى جىلدىڭ اقپان ايىندا قونىس اۋدارۋشىلاردىڭ كوبى تۇركىمەنستاننان قازاقستانعا جونەلتىلدى»، - دەپ جازدى باسىلىم.
"ادىرنا" ۇلتتىق پورتالى.
