تاكسي باعاسى 15%-عا قىمباتتاماق

574

ساراپشىلار ءبىر ايدان كەيىن تاكسي قۇنى تاعى 10-15%-عا قىمباتتاۋى مۇمكىن ەكەنىن ايتادى، دەپ حابارلايدى “ادىرنا” ۇلتتىق پورتالى “حابار”ارناسىنا سىلتەمە جاساپ. 

ەلدە تاكسي قىزمەتىنىڭ قۇنى شارىقتاپ كەتتى. ماماندار مۇنىڭ سەبەبى نارىقتا ساناۋلى كومپانيا بولعاندىقتان، باسەكە جوق دەيدى. جولاۋشىلار تاكسي باعاسىنىڭ قىمباتتاپ بارا جاتقانىنا نارازىلىق تانىتتى. اسىرەسە ىرى قالالاردا كۇن رايىنىڭ وزگەرۋىنە بايلانىستى جانە كولىك كەپتەلىسى كەزىندە جول اقىسى وزگەرەدى دەيدى.

استانالىقتار جۇمىستان كەيىن ءىشى لىق تولى قوعامدىق كولىككە سىعىلىسىپ مىنۋگە تىرىسادى. ەگەر ۇلگەرمەسە، تاكسي قىزمەتىنە جۇگىنۋگە تۋرا كەلەدى. ال تاكسي قۇنى كەشكى التىدان كەيىن شارىقتاپ كەتەدى. 

“حالىقتىڭ 90 پايىزدان استامى ءموبيلدى قوسىمشا ارقىلى تاكسي قىزمەتىن پايدالانادى.  كولىكتىڭ باعاسى 15 پايىز قىمباتتايدى. جانە جانارماي قىمباتتاۋى دا سەبەپ بولىپ وتىر. سونىمەن قاتار باسەكەلەستىك بولماۋى دا اسەر ەتەدى. ءموبيلدى قوسىمشاعا تىركەلگەندەردىڭ سۇرانىسى ارتادى، ونىڭ ۇستىنە كەپتەلىس بار. وسى فاكتورلارعا بايلانىستى قۇنى ەسەپتەلەدى”، – دەيدى قازاقستان تاكسي قاۋىمداستىعىنىڭ توراعاسى مەدەت قۇرمانوۆ. 

بۇل سالانى باقىلاۋعا الۋ قاجەت ەكەنى جىلدار بويى ايتىلىپ كەلەدى. دەگەنمەن ناتيجە جوق. قازىر ەلدە رەسەيلىك تەحنولوگيالىق الپاۋىتپەن باسەكەلەسە المايتىن بىرنەشە كومپانيا بار. بۇرىنعى ديسپەتچەرلىك قىزمەتتەر جوقتىڭ قاسى.  سالا ماماندارىنىڭ ايتۋىنشا، تاكسوپاركتەر قازىر Yandex, Uber نەمەسە Didi سەكىلدى اگرەگاتورلارمەن سەرىكتەستىكتە. نارىق ءوزىن-ءوزى قالىپتاستىرادى. بۇعان مەملەكەتتىك ورگانداردىڭ ارالاسۋى ءجون ەمەس دەيدى. 

“2010 جىلدان باستاپ بىزدە كلاسسيكالىق تاكسوپارك بولدى. 2014 جىلى taxi.kz ءموبيلدى قوسىمشامىز بولدى. سول جىلى نارىققا يندرايۆەر كەلدى. ءبىز ولارمەن ۇزاق ۋاقىت باسەكە بولدىق. 2015-16 جىلدارى ياندەكس پەن Uber نارىققا كىرىپ، ءبىزدىڭ ءموبيلدى قوسىمشامىز ولارمەن باسەكەلەسە المادى. ديدي قىستا كەلىپ، نارىققا كىرۋگە ۇمتىلدى. بۇل تاريفتەرگە دە اسەر ەتتى، جۇرگىزۋشىلەر مەن جولاۋشىلار  وسى باسەكەدە پايدا تاپتى. ەلدە مونوپوليست جوق، بۇل بىزگە پايدالى”، – دەيدى تاكسوپارك يەسى تيمۋر قۇدايبەرگەنوۆ. 

بىراق ەلدە تاكسي نارىعىنىڭ مونوپوليالانۋى جايلى ايتۋعا نەگىز جوق. بۇل ساراپشى پىكىرى. قازىر جەرگىلىكتى كومپانيالار جويىلىپ، شەتەلدىك پلاتفورمالار نارىقتى باسىپ الدى. ولارمەن كىشى تاكسوپاركتەر باسەكەلەسە المايدى.

“وكىنىشكە قاراي، ءبىزدىڭ IT-كومپانيالار دەر كەزىندە قيمىلدامادى. شەتەلدىك كومپانيالاردىڭ ەشقايسىسى مەملەكەتتىك ەمەس، جەكە كومپانيا. سوندىقتان ءبىزدىڭ IT-كومپانيالارىمىزعا تاپسىرىستار قىزمەتىنىڭ وسىنداي سەرۆيستەرىن جاساۋعا ەشكىم كەدەرگى جاساعان جوق. مىسالى، ۋكراينا نارىعى ءدال سولاي. وندا كوشباسشىلاردىڭ ءبىرى - جەرگىلىكتى كومپانيا. IT-نارىعىنىڭ ناشار دامۋىنا بايلانىستى ەلدە باسەكە دە بولماي وتىر”، – دەيدى حالىقارالىق ينۆەستيتسيالىق كومپانيا ساراپشىسى اندرەي چەبوتارەۆ. 

تۇتىنۋشىلار باعاسىنىڭ دۇنيەجۇزىلىك دەرەكقورى مالىمەتتەرىنە سايكەس، قازاقستان بۇگىندە تمد ەلدەرىندەگى تاكسي قىزمەتتەرىنىڭ ەڭ جوعارى تاريفتەرى بويىنشا العاشقى ۇشتىككە كىرەدى. ساراپشىلاردىڭ بولجامى بويىنشا، ءبىر ايدان كەيىن باعالار تاعى 10-15% كوتەرىلۋى مۇمكىن.

”ادىرنا” ۇلتتىق پورتالى

پىكىرلەر
ۇقساس جاڭالىقتار