تۇرمەدە وتىرعان قازاقستاندىق بالاسىنا بۇيرەگىن بەرگەن

2625
Adyrna.kz Telegram

قاج كوميتەتى مەديتسينالىق قامتاماسىز ەتۋ ءبولىمىنىڭ قىزمەتكەرى گۇلجان مۇساباەۆا پەنيتەنتسيارلىق جۇيەنىڭ تاريحىندا العاش رەت ورىن العان بۇيرەك جەتىسپەۋشىلىگىنەن ترانسپلانتاتسيا جاسالعانى تۋرالى ايتىپ بەردى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.

ادىلەت مايورى قىلمىستىق-اتقارۋ جۇيەسى ورگاندارىنداعى قىزمەتىن 2014 جىلدان بەرى اتقارىپ كەلەدى. ول قىزمەت بارىسىندا سوتتالعانداردىڭ دا، ولاردىڭ تۋىستارىنىڭ دا كوپتەگەن وتىنىشتەرىن قاراعانىن ايتادى. ولاردىڭ ارقايسىسى جەكە-دارا قاراۋدى قاجەت ەتەدى، ونىڭ اراسىندا پەنيتەنتسيارلىق جۇيەگە ءتان ەمەس جاعدايلار دا كەزدەسىپ وتىرادى. 2018 جىلدىڭ ءساۋىر ايىندا كوميتەتكە جازاسىن وتەپ جاتقانداردىڭ ءبىرىنىڭ جۇبايىنان ءوتىنىش كەلىپ ءتۇستى. ول ءوز حاتىندا شۇعىل تۇردە بۇيرەك ترانسپلانتاتسياسىن قاجەت ەتەتىن ءتورت جاسار ۇلىنا دونورلىق كومەك كورسەتۋدى سۇرادى.

– ىشكى ورگانداردى ترانسپلانتاتسيالاۋ، ياعني بۇل جاعدايدا بۇيرەك ترانسپلانتاتسياسى ناۋقاس ادامنىڭ اعزاسىمەن ۇيلەسەتىن دەنى ساۋ دونوردىڭ بولۋىن بىلدىرەدى. كوبىنەسە بيولوگيالىق اتا-انالاردىڭ وزدەرى دونور بولىپ تابىلادى، ويتكەنى ەرەسەك ادام ءۇشىن دە، بالا ءۇشىن دە تىرشىلىك ارەكەتىن قولداۋ ءۇشىن كەم دەگەندە ءبىر بۇيرەكتىڭ بولۋى جەتكىلىكتى، – دەيدى گۇلجان مۇساباەۆا.

ول ۋاقىتتا بالانىڭ تۋعان اكەسى شىعىس قازاقستان وبلىسى بويىنشا قاج دەپارتامەنتىنە قاراستى ورتاشا قاۋىپسىز مەكەمەدە جازاسىن وتەپ جاتتى.

– بالانىڭ اۋىر ءحالىن ەسكەرە وتىرىپ، ءبىز دەرەۋ سوتتالعاندى ءتيىستى ساراپتامالاردان وتكىزۋگە كىرىستىك. بۇل جۇمىسقا بىزگە انا مەن بالا ۇلتتىق عىلىمي ورتالىعى كومەكتەستى، وندا مامانداردىڭ باقىلاۋىمەن جاس پاتسيەنت ءبىزدى كۇتتى، – دەپ قوستى مايور.

سوتتالعاندى ەلورداعا جەتكىزۋ جازاسىن وتەپ جاتقان مەكەمەنىڭ جانە قاج كوميتەتى قىزمەتكەرلەرىنىڭ كومەگىمەن جۇزەگە اسىرىلدى. دەلەگاتسيا قۇرامىنا گۇلجان مۇساباەۆا دا كىردى، ول ايداۋىلداۋدى باسقاردى، انا مەن بالا ۇعو دارىگەرلەرىمەن جانە بالانىڭ اناسىمەن بايلانىستا بولدى.

– نەگىزگى دياگنوستيكالىق ءىس-شارالار سوتتالعاننىڭ اعزاسىنىڭ ودان ءارى ترانسپلانتاتسيالاۋعا ۇيلەسىمدىلىگى مەن جارامدىلىعىن كورسەتتى. وتا ءساتتى ءوتىپ، پاتسيەنتتەردىڭ جاعدايى كوپ ۇزاماي قالىپقا كەلدى. سوتتالعان جازاسىن ودان ءارى وتەۋ ءۇشىن كولونياعا قايتا جەتكىزىلدى، – دەپ قورىتىندىلادى مۇساباەۆا.

ءبىر بۇيرەگىن بالاسىنا بەرگەن ازامات باس بوستاندىعىنان ايىرۋ ورىندارىنان وتكەن جىلى بوساتىلدى.

«ادىرنا» ۇلتتىق پورتالى

پىكىرلەر