ونەر كەشى قازاقستان بويىنشا العاش رەت ءۇشىنشى مەگاپوليستە ءوتىپ وتىر. ەل تاۋەلسىزدىگىنىڭ 30 جىلدىعىنا ورايلاستىرىلعان ءىس-شارانى "Fatyma" قايىرىمدىلىق قورى شىمكەنت قالاسى اكىمدىگىنىڭ قولداۋىمەن ۇيىمداستىرعان. بۇل كەشتىڭ ەرەكشەلىگى سول - بالالار ۇيلەرىنىڭ تاربيەلەنۋشىلەرى بەلگىلى ساحنا جۇلدىزدارىمەن بىرگە ونەر كورسەتتى.
كونتسەرتتى تاماشالاۋعا قالا اكىمى مۇرات ايتەنوۆ، قالالىق ءماسليحاتتىڭ دەپۋتاتتارى مەن باسقارما باسشىلارى، قوعام قايراتكەرلەرى، قالا تۇرعىندارى جينالدى.
– بۇگىنگى كەشتى ەرەكشە كەش دەپ سەنىممەن ايتا الامىز. "مەيىرىم مەكەنىندە" جوباسى بيىل قولعا الىنىپ، العاش رەت شىمكەنتتە باستالىپ وتىر. بۇل ءبىز ءۇشىن ۇلكەن ماقتانىش ءارى جاۋاپكەرشىلىك. وزدەرىڭىز تاماشالاپ وتىرعانداي، ەرەكشە تاعدىرلى بالالار ءوز ونەرلەرىن سىزدەرگە پاش ەتۋدە. ەلىمىزدە قازىرگى تاڭدا بالالار ۇيلەرىنىڭ سانى ازايىپ، پاتروناتتىق تاربيە كەڭ جولعا قويىلىپ كەلەدى. ال بالاقايلار بىزدەردى، ەرەسەكتەردى ءاردايىم قۋانتا بەرسىن! – دەدى شىمكەنت قالاسىنىڭ اكىمى مۇرات ايتەنوۆ.
ونەر كەشىندە ءتۇرلى تاعدىرلى بالالار بەكجان تۇرىس، ناركەنجە سەرىكباەۆا، زاتتىبەك كوپبولسىنۇلى، تاڭات مامىرحانۇلى سەكىلدى تانىمال ونەر جۇلدىزدارىمەن بىرگە ساحنادا ءان سالدى، ونەرلى توپتار بي بيلەدى، سپورتتىق ماشىقتارىن كورسەتتى.
ونەر كەشىندە شىمكەنت قالاسى اكىمدىگىنىڭ اتىنان ءار بالاقايعا باعالى سىيلىقتار تابىس ەتىلدى. سونىمەن قوسا وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ رەكتورى گۇلجان سۇگىرباەۆا بالالار ءۇيىنىڭ ءبىر تۇلەگىن كەلەر جىلى گرانتپەن وقۋعا قابىلداۋعا ۋادە ەتتى.
