بەلگىلى كاسىپكەر، جازۋشى، جۋرناليست، ۇلت قايراتكەرى قۇرمانعالي اشانۇلى اۋىرىپ، دۇنيەدەن وزدى. قازاق كاسىپكەرلىگىن دامىتۋ تۋرالى "قازاق كاسىپكەرىنىڭ الىپپەسى" اتتى كىتاپتى تۇڭعىش رەت جازىپ، ەلىنىڭ ىستىق ىقىلاسىنا بولەنگەن ءبىلىمدى ازامات 65 جاسىندا پانيدەن باقيعا اتتاندى دەپ حابارلايدى "ادىرنا" ۇلتتىق پورتالى.
قۇرمانعالي اشانۇلى 1956 جىلى قىزىلوردا وبلىسى، جالاعاش اۋدانى، ەڭبەك اۋىلىندا دۇنيەگە كەلگەن. اۋىل مەكتەبىنىڭ 7-سىنىبىنان كەيىن الماتى قالاسىنداعى №178 قازاق ورتا مەكتەبىن بىتىرەدى . بىرنەشە جىل الماتى قالاسىندا ءتۇرلى سالادا جۇمىس اتقارادى. 1982 جىلى الماتى حالىق شارۋاشىلىعى ينتيتۋتىن ءبىتىرىپ، رەسپۋبليكالىق قارجى، ساۋدا مينيسترلىكتەرىندە جاۋاپتى قىزمەت اتقارعان.
1991 جىلدان بەرى كاسىپكەرلىكپەن اينالىسىپ كەلدى. ال 1995 جىلدان قۇرمانعالي اشانۇلى ەل مەن جەر تاريحىن تەرەڭىرەك زەرتتەۋدى قولعا الىپ، سول ويعا تۇيگەن ويلارىن زەرتتەۋلەرىن باسپاسوزدەردە جاريالاپ، وقىرمانعا وي سالاتىن پىكىرلەر ايتىپ ءجۇردى. اتاپ ايتقاندا، 2000 جىلى ونىڭ قالامىنان ء"مۇسىرالى ابىز" اتتى شاعىن كىتاپشاسى جارىق كوردى. وسى كىتاپتى ۇلى ابىزعا قازالىدا ەسكەرتكىش اشىلۋى سالتاناتىندا تارتۋ ەتتى.
بۇل كىتاپقا قر عا اكادەميگى ، پروفەسسور ماناش قوزىباەۆ "پىرگە قۇرمەت – ەلگە قۇرمەت" اتتى العىسوزىندە : "قورىتا كەلە قۇرمانعالي اشانۇلىنىڭ اتالمىش ەڭبەگى ىشىندەگى قىزىقتى دەرەكتەرىمەن وقىرمان ىقىلاسىنا ءتىلى جەڭىل ، جۇردەك وقىلاتىن بۇل كىتاپ جۇرتشىلىق سۇرانىسىن قاناعاتتاندىرا الاتىن پۋبليتسيستيكالىق تۋىندى قاتارىنا جاتقىزۋعا ابدەن بولادى",– دەپتى.
سونداي-اق قۇرمانعالي اشانۇلى شاعىن بيزنەس حاقىندا 30 ءتۇرلى ءوز تاجىريبەسىندە كەزدەسكەن قاعيدانى بىرنەشە باسىلىمداردا جاريالاپ، كەيىن "قازاق كاسىپكەرىنىڭ الىپپەسى" اتتى كىتاپ جازىپ، باسپادان شىعاردى. اۆتوردىڭ وسى كىتابى ەل ىقىلاسىنا بولەنىپ، ەلباسى كىتاپحاناسىنا دا قويىلعان.
سوڭعى جىلدارى جارىق كورگەن ونىڭ "ۇلتتىق مۇددە – جەكە كاسىپكەر" اتتى كىتابى دا وقىرمان جۇرەگىنەن ورىن الىپ، ارىسى قىتاي حالىق رەسپۋبليكاسىنداعى باسىلىمداردا، ەلىمىزدە اۆتور رۇقساتىمەن گازەت-جۋرنالداردا جاريالاندى.
بۇل عۇمىردا قۇرمانعالي اشانۇلى جۇبايى ساۋلەمەن بىرگە ءۇش قىز تاربيەلەپ ءوسىردى. ۇشەۋىن دە وقىتىپ، قىزدارىن قياعا قوندىردى.
"ادىرنا" ۇلتتىق پورتالى مارقۇمنىڭ وتباسىنا، جاقىن-جۋىعىنا قايعىرىپ كوڭىل ايتادى.
"ادىرنا" ۇلتتىق پورتالى
