جاقىندا ەكىنشى رەت تۇرمىسقا شىققان ءانشى التىناي جوراباەۆا وزىنەن التى جاس كىشى كۇيەۋىنەن ماھىرگە سۋ جاڭا كولىك سۇراعان دەپ حابارلايدى "ادىرنا" ۇلتتىق پورتالى "Express Qazaqstan" سايتىنا سىلتەمە جاساپ.
بۇل تۋرالى ءانشى ءوزىنىڭ Instagram-داعى پاراقشاسىندا جازدى. نەكە قيعاندا ايەلدىڭ ماھىرگە ءزاۋلىم ءۇي، قىمبات كولىك، iphone تالاپ ەتۋى دۇرىس پا؟ ەلدىڭ الدىندا جارقىراپ جۇرگەن جۇلدىزداردىڭ ماھىرگە قىمبات كولىك الىپ، ونىسىن ماقتانىپ جەلىگە سالۋى قانشالىقتى دۇرىس؟ وسى ساۋالدارعا جاۋاپ بەرگەن الماتى قالاسىنداعى دىنمۇحامەد قوناەۆ اتىنداعى مەشىتتىڭ باس يمامى تانىمال ادامداردىڭ ماھىرگە العان دۇنيەسىن جارياعا جار سالىپ كورسەتۋى دۇرىس ەمەس ەكەنىن ايتادى. سەبەبى ولارعا ەلىكتەيتىن جاستار كوپ.
— قالىڭدىقتىڭ ءزاۋلىم ءۇي، قىمبات كولىك سۇراۋى دۇرىس ەمەس. وسىنداي تالاپتىڭ سالدارىنان جاستار ءبىرىن-ءبىرى تۇسىنبەي اجىراسىپ كەتكەندەر دە جەتەرلىك. ايەلگە ءوزىنىڭ اكەسى نەمەسە اناسى جاعىنان جاقىن تۋىستارىنا بەرىلگەندەي ءماھىر بەرىلۋى كەرەك،— دەيدى مەيىرجان راحماتۋللاۇلى.
يمامنىڭ ايتۋىنشا، قالىڭدىق ءماھىر سۇراعاندا بولاشاق كۇيەۋىنىڭ جاعدايىنا قاراۋى كەرەك. ول قالىڭدىعىنىڭ قالاۋىن ساتىپ اپەرەم دەپ ءوزى قارىزعا باتىپ كەتپەۋگە ءتيىس.
— كۇيەۋدى قارىزعا باتىراتىنداي كوپ نەمەسە قىزدىڭ كوڭىلىن رەنجىتەتىندەي كەم بولماۋى كەرەك. ءماھىردى بىردەن بەرۋگە شاماسى جەتپەسە، ونىڭ ءبىر بولىگىن الدىن الا بەرىپ، قالعانىن كەيىن بەرە الادى،— دەيدى باس يمام.
ايتا كەتۋ كەرەك، ءماھىر — ەر ادامنىڭ قالىڭدىعىنا جاسايتىن سىيلىعى. ءماھىردىڭ ەڭ تومەنگى مولشەرى 10 ديحرام، ياعني 60 مىڭ تەڭگە.
"ادىرنا" ۇلتتىق پورتالى.
