سەمەيدە مۇعالىمدەردى كوشە سىپىرۋعا جىبەرگەن لاۋازىمدى تۇلعالار اكىمشىلىك جاۋاپقا تارتىلدى. ولاردىڭ اراسىندا قالا اكىمىنىڭ ورىنباسارى دميتري گاريكوۆ تا بار، دەپ حابارلايدى ءبىلىم جانە عىلىم مينيسترلىگىنىڭ ءباسپاسوز قىزمەتى.
بۇعان قوسا، مينيسترلىك اكىم ورىنباسارىنا قاتىستى تارتىپتىك شارا قولدانۋ تۋرالى حات جولداعان.
سونداي-اق سەمەي قالاسى ءبىلىم ءبولىمىنىڭ باسشىسى ناتاليا فەسەنكو سوگىس الدى جانە اكىمشىلىك جازاعا تارتىلدى.
№9 ورتا مەكتەپتىڭ ديرەكتورى ن.ۆ. تەگاي مەن №43 ورتا مەكتەپ ديرەكتورىنىڭ مىندەتىن اتقارۋشى ا.ۆ. يسكرينا دا اكىمشىلىك جاۋاپكەرشىلىككە تارتىلدى.
ەسكە سالساق، 16 قازاندا الەۋمەتتىك جەلىدە سەمەيدىڭ №43 مەكتەبىندە وقۋ پروتسەسىنە كەدەرگى كەلتىرىپ، مۇعالىمدەردى سەنبىلىككە كوشە سىپىرۋعا جىبەرگەنى تۋرالى اقپارات تارادى.
ءبىلىم مينيسترلىگىنىڭ قىزمەتكەرلەرى اكىمشىلىك ءىستى قارادى. تەكسەرىس بارىسىندا سەنبىلىككە №43 مەكتەپتىڭ مۇعالىمدەرىنەن بولەك، №9 مەكتەپتىڭ مۇعالىمدەرى دە جىبەرىلگەنى انىقتالدى.
مۇعالىمدەر قالانى اباتتاندىرۋ جۇمىستارىنا سەمەي قالاسى اكىمىنىڭ ورىنباسارى دميتري گاريكوۆتىڭ حاتى نەگىزىندە شىققان. حاتتا ۇستازداردىڭ سەنبىلىككە تاڭعى ساعات 09.00-دا شىعۋىن قامتاماسىز ەتۋ تاپسىرىلعان. ءار مەكتەپكە اۋماقتى تازارتۋ جۇمىستارىن جۇرگىزۋ ءۇشىن بەلگىلى ءبىر ۋچاسكە بەرىلگەن. تاپسىرمانىڭ ورىندالۋىن باقىلاۋ اكىمدىكتەگى بولىمشەلەردىڭ بىرىنە جۇكتەلگەن.
وسىدان كەيىن ءبىلىم مينيسترلىگى وبلىستار مەن رەسپۋبليكالىق ماڭىزى بار قالالاردىڭ اكىمدىكتەرىنە مۇعالىمدەردى قىزمەتىنەن تىس جۇمىستارعا تارتۋعا، وقۋ پروتسەسىنە كەدەرگى كەلتىرۋگە بولمايتىنى تۋرالى حات جولدادى. سەبەبى بۇل "پەداگوگ مارتەبەسى تۋرالى" زاڭعا قايشى كەلەدى.
