Aqmola oblysynda Táýelsizdiktiń 30 jyldyǵyna oraı ulttyq at sporty túrlerinen jarys ótti. Aıtýly dodaǵa 100-ge tarta sáıgúlik qatysyp, 4 sport túrinen shabandozdar baq synasty. Bul týraly “Adyrna” ulttyq portaly “Qazaqstan” ulttyq arnasyna silteme jasap habarlaıdy.
Baǵy men baby synǵa túsetin nebir sáıgúlik osy alańda.. Baıraqty básekege kil myqty atbegiler jınalǵan. Jarys teńge alý, báıge, kókpar syndy birneshe ulttyq oıynnan turdy. Alǵashqysy «Kókpar» oıyny.
Oıyn áý bastan aq qyza tústi. Ortaǵa otyz keli serke tastaldy. 48 shabandozdyń talasý sáti bastaldy. Úsh saǵatqa sozylǵan oıynda ereımentaýlyq kókparshylar alǵashqy kezeńnen kózge túsip, bas júldeni qanjyǵasyna baılady.
Saǵı Amantaev, «Aqmyrza» komandasynyń qorǵaýshysy:Jarysqa úlken daıyndyqpen keldik. Qarsylastarymyz jaıly barlyq málimetterde boldy. Jattyqtyrýshylarymyzdyń arqasynda osyndaı jetistikke jettik.
Jamby atýda jas jigitterdiń mergendigi synǵa tústi. 20-ǵa jýyq shabandoz nysanany meılinshe dál kózdeýge tyrysty. Dese de elordalyq Dıas Berikulynyń baǵy janyp, 26 upaımen birinshi oryn ıelendi.
Al teńge ilýde eptilik qajet. At ústinde otyryp, olja alý ońaı emes. 10 myqtynyń ishinen kókshetaýlyq Ádil Maqsatuly 8 sekýndta 3 teńgeni ilip, sýyrylyp alǵa shyqty.
Ádil Maqsatuly, Teńge alý saıysynyń jeńimpazy:Osy sportqa eń kishi jastan keldim. Qazaqstan chempıonatyndaǵy jeńisten úmitim bar.
Sáıgúlikter básekesin ádettegideı alaman báıge túıindedi. Aýyzdyǵymen alysqan 20 jorǵa 7 shaqyrymǵa shapty. Aınalymnan shyǵyp qalǵan tulparlar da az bolmady. Solardyń ishinen elordalyq «Sarqyrama» atty sáıgúlik qara úzip shyqty. Júırik janýardy erttegen eń kishi qatysýshy 11 jastaǵy Dıdarǵa báıgeniń bas júldesi buıyrdy.
Dıdar Serken, Alaman báıgeniń jeńimpazy:9 jasymnan bastap báıgege shaptym. Atymyz myqty boldy.
Pandemııadan keıin qaıta jańdanǵan ulttyq sport túrlerin aldaǵy ýaqytta da keńinen nasıhattaý josparda bar deıdi, uıymdastyrýshylar.
Ǵalymjan Kenjeshuly, Aqmola oblysy ákiminiń orynbasary:Táýelsizdigimizdiń 30 jyldyǵyna oraı osyndaı is-shara uıymdastyrý josparlandy. Kelesi jylǵa aýdandarda ótkiziledi. Munyń túpki negizgi maqsaty - jigitterdiń patrıotızmin, jerge degen súıispenshiligin arttyrý.
Baıqaý sońy kórmege ulasty. Iaǵnı, jankúıerlerge osy dodaǵa qatysqan 100 tulpardy tamashalaý múmkindigi berildi.
“Adyrna” ulttyq portaly
