فريستايل موگۋل بويىنشا سپورت شەبەرى، ءتۇرلى جارىستاردىڭ جەڭىمپازى گەبەرت الەكساندر مالىمدەمە جاساپ، ءوزىن قۇرامادان كەتۋگە ماجبۇرلەگەنىن ايتتى. ونىڭ سوزىنشە، جاتتىقتىرۋشىسى اقشانى كارتاسىنا جىبەرۋىن تالاپ ەتكەن. سونىمەن قاتار جاتتىقتىرۋشى تاراپىنان قىسىم كورگەنىن مالىمدەدى، دەپ حابارلايدى Kznews.kz اقپارات اگەنتتىگى.
گەبەرت 2020 جىلى ۇلتتىق قۇرامادان كەتكەن. سوڭعى جارتى جىل قۇرىلىسشى بولىپ جۇمىس ىستەگەن جانە ۇلكەن سپورتقا قايتا ورالعىسى كەلەتىنىن ايتادى.
«مەنى 2020 جىلى ءوز ەركىممەن قۇرامادان كەتۋگە ماجبۇرلەدى. ەگەر بۇلاي جاساماسام، “جارامسىز” دەپ تاۋىپ، ارنايى باپپەن قۇرامادان شىعاراتىنىن ايتتى. بىراق مۇنى ادىلەتسىزدىك دەپ سانايمىن. سەبەبى مەن سپورت شەبەرىمىن، بىرنەشە جارىستاردا جەڭدىم. جاقسى ناتيجەلەر كورسەتتىم»، – دەپ مالىمدەدى ول ءوز Instagram پاراقشاسىندا.
گەبەرتتىڭ سوزىنشە، جاتتىقتىرۋشى سپورتشىلارعا بەرىلگەن اقشانى وز كارتاسىنا اۋدارۋدى تالاپ ەتكەن.
«ءار ماۋسىم سوڭىندا قۇراماداعى سپورتشىلارعا اقشا بەرىلەدى. بۇل – جيىن كەزىندە تاماقتانۋعا بولىنگەن قارجىنىڭ قالعان بولىگى. قارجىنىڭ نەلىكتەن بەرىلگەنىن كوماندا كاپيتانىنان سۇراپ ءبىلدىم. دال سول ۋاقىتتا ءبىزدىڭ باس جاتتىقتىرۋشىمىز مەسسەندجەر ارقىلى العان اقشامىزدى 1 ساعاتتىڭ ىشىندە ءوز كارتاسىنا جىبەرۋدى تالاپ ەتتى. ەشكىم باس تارتا المادى. مەن جاتتىقتىرۋشى جانە سپورتشى اراسىندا دۇرىس قارىم-قاتىناس بولۋىن تالاپ ەتتىم. بىراق جاۋاپ رەتىندە بالاعات ءسوز ەستىدىم»، – دەپ قوستى ول.
سپورتشى نەلىكتەن قارجىنى جىبەرۋ كەرەك ەكەنىن سۇراعانىندا، قورلاپ، پسيحولوگيالىق قىسىم كورسەتكەن. سونىمەن قاتار مۇنداي قىسىمنىڭ حالىقارالىق جانە رەسپۋبليكالىق جارىستار كەزىندە، دايىندىق بارىسىندا دا بولاتىنىن ايتادى.
«بۇل جاتتىقتىرۋشىنىڭ بىلىكسىزدىگىن كورسەتەدى. ەشكىم مۇنى ايتپايدى. مەن سپورتقا 14 جىلىمدى ارنادىم. العان جاراقاتتار دا از ەمەس، بىراق قايتا
تۇرىپ، ەلىمنىڭ نامىسىن قورعادىم. ۇلتتىق قۇرامادان قۋىلۋعا لايىقتى ەمەسپىن دەپ سانايمىن. مەنىڭ قولىمدا قۇراماعا قوسىلۋ جايلى بارلىق انىقتامالار مەن ناتيجەلەر بار»، – دەدى الەكساندر گەبەرت.
بۇدان بولەك، سپورتشىعا جەڭىل اتلەتيكالىق مانەج باتۋتىندا جاتتىعۋعا تىيىم سالىنعان. قازىر گەبەرتتىڭ جاتتىعۋلارىن وتباسى مەن جاقىندارى قارجىلاندىرىپ وتىر.
