Frıstaıl mogýl boıynsha sport sheberi, túrli jarystardyń jeńimpazy Gebert Aleksandr málimdeme jasap, ózin quramadan ketýge májbúrlegenin aıtty. Onyń sózinshe, jattyqtyrýshysy aqshany kartasyna jiberýin talap etken. Sonymen qatar jattyqtyrýshy tarapynan qysym kórgenin málimdedi, dep habarlaıdy Kznews.kz aqparat agenttigi.
Gebert 2020 jyly Ulttyq quramadan ketken. Sońǵy jarty jyl qurylysshy bolyp jumys istegen jáne úlken sportqa qaıta oralǵysy keletinin aıtady.
«Meni 2020 jyly óz erkimmen quramadan ketýge májbúrledi. Eger bulaı jasamasam, “jaramsyz” dep taýyp, arnaıy bappen quramadan shyǵaratynyn aıtty. Biraq muny ádiletsizdik dep sanaımyn. Sebebi men sport sheberimin, birneshe jarystarda jeńdim. Jaqsy nátıjeler kórsettim», – dep málimdedi ol óz Instagram paraqshasynda.
Geberttiń sózinshe, jattyqtyrýshy sportshylarǵa berilgen aqshany óz kartasyna aýdarýdy talap etken.
«Ár maýsym sońynda quramadaǵy sportshylarǵa aqsha beriledi. Bul – jıyn kezinde tamaqtanýǵa bólingen qarjynyń qalǵan bóligi. Qarjynyń nelikten berilgenin komanda kapıtanynan surap bildim. Dál sol ýaqytta bizdiń bas jattyqtyrýshymyz messendjer arqyly alǵan aqshamyzdy 1 saǵattyń ishinde óz kartasyna jiberýdi talap etti. Eshkim bas tarta almady. Men jattyqtyrýshy jáne sportshy arasynda durys qarym-qatynas bolýyn talap ettim. Biraq jaýap retinde balaǵat sóz estidim», – dep qosty ol.
Sportshy nelikten qarjyny jiberý kerek ekenin suraǵanynda, qorlap, psıhologııalyq qysym kórsetken. Sonymen qatar mundaı qysymnyń halyqaralyq jáne respýblıkalyq jarystar kezinde, daıyndyq barysynda da bolatynyn aıtady.
«Bul jattyqtyrýshynyń biliksizdigin kórsetedi. Eshkim muny aıtpaıdy. Men sportqa 14 jylymdy arnadym. Alǵan jaraqattar da az emes, biraq qaıta
turyp, elimniń namysyn qorǵadym. Ulttyq quramadan qýylýǵa laıyqty emespin dep sanaımyn. Meniń qolymda quramaǵa qosylý jaıly barlyq anyqtamalar men nátıjeler bar», – dedi Aleksandr Gebert.
Budan bólek, sportshyǵa jeńil atletıkalyq manej batýtynda jattyǵýǵa tyıym salynǵan. Qazir Geberttiń jattyǵýlaryn otbasy men jaqyndary qarjylandyryp otyr.
