بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇلتتىق قورىنان 2022 – 2024 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوباسى ماقۇلداندى.
تالقىلاۋ بارىسىندا ءماجىلىس دەپۋتاتى، «اق جول» دەموكراتيالىق پارتياسىنىڭ توراعاسى ازات پەرۋاشەۆ ۇلتتىق قوردان الىناتىن ترانسفەرتتەر ماسەلەسىن كوتەردى.
– ۇسىنىلعان ءۇش جىلدىق بيۋدجەتتە ۇلتتىق قوردان بولىنەتىن ترانسفەرتتەر سوماسىن كەزەڭ-كەزەڭىمەن تومەندەتۋ قاراستىرىلعان (2 ترلن 950 ملرد تەڭگەدەن 2 ترلن 400 ملرد تەڭگەگە دەيىن). الايدا، بيۋدجەتتىڭ جىل سايىنعى ناقتىلانۋى كەزىندە بۇل سوما ەكى ەسەگە دەرلىك ۇلعايادى (ماسەلەن، 2021 جىلعا نىسانالى ترانسفەرت مولشەرى 850 ملرد. تەڭگەگە ۇلعايتىلدى، دەگەنمەن باستاپقىدا بيۋدجەتتە 1 ترلن. تەڭگە بەكىتىلگەن). بۇل رەتتە، ەسەپ كوميتەتىنىڭ تەكسەرىس ناتيجەلەرى بويىنشا 1 ترلن تەڭگە بيۋدجەت قاراجاتىنىڭ ءتيىمسىز پايدالانىلعانى انىقتالدى، - دەدى ا. پەرۋاشەۆ.
دەپۋتاتتىڭ سوزىنشە، اعىمداعى جىلدىڭ ءبىرىنشى جارتى جىلدىعىندا ۇلتتىق قور شىعىستارىنىڭ كولەمى تۇسىمدەردەن اسىپ تۇسكەن.
–2022 جىلى ۇلتتىق قوردىڭ جيناقتارى ءجىو-ءنىڭ 30%-نا، تومەندەمەيتىن شەكتى مولشەرىنە جاقىندايدى، ال 2023-24 جىلدارى ولار وسى شەكتەن دە اسىپ كەتۋى مۇمكىن دەپ بولجانۋدا, - دەگەن «اق جول» پارتياسىنىڭ توراعاسى ۇلتتىق قوردان الىناتىن قارجىنىڭ ءتيىمدى جۇمسالىپ، قاتاڭ باقىلانۋى كەرەكتىگىن ايتتى.
سونداي-اق ول مەملەكەتتىك قارىز ماسەلەسىن دە كوتەردى.
– مەملەكەتتىك قارىز 2024 جىلعا قاراي بيۋدجەت ساياساتى تۇجىرىمداماسىندا رۇقسات ەتىلگەن ءجىو-ءنىڭ 27%-نىڭ ورنىنا شامامەن 32% مولشەرىندە بولادى كۇتىلەدى، - دەدى دەپۋتات.
ونىڭ ايتۋىنشا، 2026 جىلعا قاراي ۇكىمەتتىڭ قارىزى 2020 جىلعا قاراعاندا 2 ەسە كوپ، ياعني، 32 ترلن. تەڭگەگە دەيىن جەتەدى دەپ كۇتىلۋدە.
– وسىعان بايلانىستى، «اق جول» دەموكراتيالىق پارتياسى ۇلتتىق قوردىڭ قاراجاتىن باسقارۋدى رەتتەيتىن نورماتيۆتىك قۇجاتتاردى، سونداي-اق مەملەكەتتىك قارىزدى تارتۋ جانە وتەۋ ءتارتىبىن قايتا قاراۋ قاجەت دەپ سانايدى، - دەدى ا. پەرۋاشەۆ.
تالقىلاۋ بارىسىندا ءماجىلىس دەپۋتاتى وتاندىق بيزنەستى قولداۋ ماسەلەسىن ەرەكشە اتاپ ءوتتى.
«ساۋدا مينيسترلىگىنە ەكسپورتتى ىلگەرىلەتۋگە بولىنگەن 742 ملن تەڭگەنىڭ 223 ملن تەڭگەسىن «كەڭەس الۋ» قىزمەتىنە جۇمساۋ جوسپارلانۋدا. ۇلتتىق ەكونوميكا مينيسترلىگى ءمجا (گچپ) جوبالارىن كونسۋلتاتسيالىق سۇيەمەلدەۋگە جانە تەن-گە 1 ملرد تەڭگەدەن استام قاراجات جۇمساۋدى جوسپارلاپ وتىر، بۇل رەتتە مۇنداي 6 جوبا بار. تاعى 1,5 ملرد-تى وسى مينيسترلىك 10 زەرتتەۋ جۇمىسى ءۇشىن تولەگىسى كەلەدى، - دەدى دەپۋتات.
ازات پەرۋاشەۆ ءوز سوزىندە ۇكىمەتتەن شىعىستاردىڭ وسى باپتارىن قايتا قاراۋدى جانە ولاردى وندىرىسكە نەعۇرلىم وزەكتى ماقساتتار مەن پراكتيكالىق كومەككە قايتا ءبولۋدى تالاپ ەتتى.
«ادىرنا» ۇلتتىق پورتالى
