Búgin Májilistiń jalpy otyrysynda «Qazaqstan Respýblıkasynyń Ulttyq qorynan 2022 – 2024 jyldarǵa arnalǵan kepildendirilgen transfert týraly» zań jobasy maquldandy.
Talqylaý barysynda Májilis depýtaty, «Aq jol» demokratııalyq partııasynyń tóraǵasy Azat Perýashev Ulttyq qordan alynatyn transfertter máselesin kóterdi.
– Usynylǵan úsh jyldyq bıýdjette Ulttyq qordan bólinetin transfertter somasyn kezeń-kezeńimen tómendetý qarastyrylǵan (2 trln 950 mlrd teńgeden 2 trln 400 mlrd teńgege deıin). Alaıda, bıýdjettiń jyl saıynǵy naqtylanýy kezinde bul soma eki esege derlik ulǵaıady (máselen, 2021 jylǵa nysanaly transfert mólsheri 850 mlrd. teńgege ulǵaıtyldy, degenmen bastapqyda bıýdjette 1 trln. teńge bekitilgen). Bul rette, Esep komıtetiniń tekseris nátıjeleri boıynsha 1 trln teńge bıýdjet qarajatynyń tıimsiz paıdalanylǵany anyqtaldy, - dedi A. Perýashev.
Depýtattyń sózinshe, aǵymdaǵy jyldyń birinshi jarty jyldyǵynda Ulttyq qor shyǵystarynyń kólemi túsimderden asyp túsken.
–2022 jyly Ulttyq qordyń jınaqtary JIÓ-niń 30%-na, tómendemeıtin shekti mólsherine jaqyndaıdy, al 2023-24 jyldary olar osy shekten de asyp ketýi múmkin dep boljanýda, - degen «Aq jol» partııasynyń tóraǵasy Ulttyq qordan alynatyn qarjynyń tıimdi jumsalyp, qatań baqylanýy kerektigin aıtty.
Sondaı-aq ol memlekettik qaryz máselesin de kóterdi.
– Memlekettik qaryz 2024 jylǵa qaraı bıýdjet saıasaty tujyrymdamasynda ruqsat etilgen JIÓ-niń 27%-nyń ornyna shamamen 32% mólsherinde bolady kútiledi, - dedi depýtat.
Onyń aıtýynsha, 2026 jylǵa qaraı úkimettiń qaryzy 2020 jylǵa qaraǵanda 2 ese kóp, ıaǵnı, 32 trln. teńgege deıin jetedi dep kútilýde.
– Osyǵan baılanysty, «Aq jol» demokratııalyq partııasy Ulttyq qordyń qarajatyn basqarýdy retteıtin normatıvtik qujattardy, sondaı-aq memlekettik qaryzdy tartý jáne óteý tártibin qaıta qaraý qajet dep sanaıdy, - dedi A. Perýashev.
Talqylaý barysynda Májilis depýtaty otandyq bıznesti qoldaý máselesin erekshe atap ótti.
«Saýda mınıstrligine eksportty ilgeriletýge bólingen 742 mln teńgeniń 223 mln teńgesin «keńes alý» qyzmetine jumsaý josparlanýda. Ulttyq ekonomıka mınıstrligi MJÁ (GChP) jobalaryn konsýltaııalyq súıemeldeýge jáne TEN-ge 1 mlrd teńgeden astam qarajat jumsaýdy josparlap otyr, bul rette mundaı 6 joba bar. Taǵy 1,5 mlrd-ty osy mınıstrlik 10 zertteý jumysy úshin tólegisi keledi, - dedi depýtat.
Azat Perýashev óz sózinde Úkimetten shyǵystardyń osy baptaryn qaıta qaraýdy jáne olardy óndiriske neǵurlym ózekti maqsattar men praktıkalyq kómekke qaıta bólýdi talap etti.
«Adyrna» ulttyq portaly
