شىمكەنتكە «ەلىم ءۇشىن ەگىلەمىن» اتتى ازاماتتىق شتابتىڭ وكىلدەرى كەلدى. اتاپ ايتقاندا، قازاقستان زاڭگەرلەر وداعىنىڭ نۇر-سۇلتان قالاسىنداعى فيليالىنىڭ توراعاسى، ازاماتتىق شتاب مۇشەسى سەرىك بەركامالوۆ پەن سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتاناەۆ قالاداعى وقۋشىلار سارايىندا مەكتەپ ديرەكتورلارى جانە مۇعالىمدەرمەن كەزدەستى.
ايتا كەتەيىك، بۇل شتاب بيىلعى تامىز ايىندا قۇرىلعان. ازاماتتىق شتابتىڭ ماقساتى – حالىققا ۆاكتسينا قابىلداۋ شاراسىنىڭ ءمان-ماڭىزىن ءتۇسىندىرىپ، ەلدى ەكپە تۋرالى جالعان اقپاراتتاردان اۋلاق بولىپ، رەسمي اقپاراتقا عانا سەنىپ، ماسەلەنىڭ اق-قاراسىن اجىراتا بىلۋگە ۇندەۋ.
—بۇكىل ەلىمىزدىڭ پاندەمياعا دەيىنگى قالىپتى ومىرگە ورالۋىنىڭ جالعىز جولى – ۆاكتسيناتسيالاۋ. بۇگىندە شىمكەنتتە ازاماتتاردىڭ باسىم بولىگى ەكپە قابىلداپ ۇلگەردى. الايدا الدىمىزدا رەۆاكتسيناتسيا ناۋقانى تۇر. ەكپە قابىلداعانىنا 9 اي تولعان ازاماتتار ەندىگى جەردە يناكتيۆتەلگەن ۆاكتسينانى قابىلداۋى ءتيىس. وعان قوسا بۇگىندە ەل ۇكىمەتى Pfizer ۆاكتسيناسىن وندىرۋشىلەرمەن كەلىسسوز جۇرگىزىپ جاتىر. الداعى ۋاقىتتا ەلىمىزگە ەكپەنىڭ وسى ءتۇرى كەلسە، جۇكتى ايەلدەر مەن وقۋشىلار ۆاكتسينالانۋى مۇمكىن، – دەدى ە.بايتاناەۆ.
ونىڭ ايتۋىنشا، ەكپە 12-17 جاس ارالىعىنداعى بالالارعا اتا-اناسىنىڭ كەلىسىمىمەن عانا سالىنادى. اتا-اناسى ەكپەدەن باس تارتقان جاعدايدا وقۋشىنى ەشكىم ماجبۇرلەپ ۆاكتسينالامايدى. ەكپە سالعىزباعان وقۋشىلار ساباقتان شەتتەتىلمەيدى.
—قالا بەردى ۆاكتسيناتسيالاۋ مەكتەپ قابىرعاسىندا جۇرگىزىلمەيدى. بۇل ۆاكتسينانى بالاسىنا سالعىزعىسى كەلگەن اتا-انالار ارنايى بەكىتىلگەن ەمحاناعا بالاسىن ەرتىپ بارۋى ءتيىس. ەكپە سول جەردە اتا-انانىڭ جانە دارىگەردىڭ باقىلاۋىمەن عانا سالىنادى. سوندىقتان، «بالاما مەكتەپتە مەنىم كەلىسىمىمسىز ۆاكتسينا سالىپ جىبەرمەي مە» دەپ قورقۋدىڭ قاجەتى جوق، – دەدى شتاب وكىلى.
سونداي-اق، ول الەۋمەتتىك جەلىلەردە «12 جاسقا تولماعان بالالار دا ۆاكتسيناتسيالانادى» دەگەن اقپارات تاراعانىن، بىراق، مۇنىڭ شىندىققا جاناسپايتىنىن دا اتاپ ءوتتى.
