بۇگىن — اقىن تالعات ەشەنۇلىنىڭ تۋعان كۇنى

1991 جىلى تارباعاتاي اۋىلىنداعى وكتيابر ورتا مەكتەبىن تامامداعان سوڭ، 1991-1996 جىلدارى ءال-فارابي اتىنداعى قازاقتىڭ مەملەكەتتىك ۇلتتىق ۋنيۆەرسيتەتى، جۋرناليستيكا فاكۋلتەتىندە وقىدى.

1996-1997 جىلدارى حالىقارالىق «زامان-قازاقستان» گازەتىندە، 1997-1998 جىلدارى «جاس الاش» رەسپۋبليكالىق گازەتىندە ءتىلشى، قوعامدىق-ساياسي ءبولىمنىڭ مەڭگەرۋشىسى بولىپ قىزمەت ىستەدى.

1998-2004 جىلدار ارالىعىندا قازاقستان رەسپۋبليكاسىنىڭ اقپارات مينيسترلىگىندە، قازاقستان رەسپۋبليكاسىنىڭ مادەنيەت، اقپارات جانە قوعامدىق كەلىسىم مينيسترلىگىندە ءتۇرلى جاۋاپتى قىزمەتتەر اتقاردى.

2004-2005 جىلدار ارالىعىندا «جاس الاش» گازەتىنىڭ استاناداعى تىلشىلەر قوسىنىنىڭ جەتەكشىسى بولدى.

2005-2008 جىلدارى «جاس قازاق» رەسپۋبليكالىق قوعامدىق-ساياسي گازەتىنىڭ باس رەداكتورى قىزمەتىن اتقاردى.

2008-2009 جىلدارى قر پرەزيدەنتى اكىمشىلىگىنىڭ سەكتور مەڭگەرۋشىسى. 2009-2010 جىلدارى «نۇر وتان» پارتياسى توراعاسىنىڭ ءبىرىنشى ورىنباسارىنىڭ كەڭەسشىسى.

قازىرگى ۋاقىتتا «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىندا باس مەنەدجەر بولىپ قىزمەت ەتەدى.

«شابىت» حالىقارالىق شىعارماشىلىق جاستار فەستيۆالىنىڭ «ادەبيەت»، «جۋرناليستيكا» نوميناتسيالارى بويىنشا (1999 جىل، 2000 جىل) جەڭىمپازى. ج.ناجىمەدەنوۆ، ت.ايبەرگەنوۆ اتىنداعى سىيلىقتاردىڭ لاۋرەاتى. قر پرەزيدەنتى ستيپەندياسىنىڭ (1999 جىل), «دارىن» مەملەكەتتىك جاستار سىيلىعىنىڭ يەگەرى (2006 جىل). «قازاقستان رەسپۋبليكاسىنىڭ تاۋەلسىزدىگىنە 10 جىل» مەدالىمەن، «اباي» حالىقارالىق مەدالىمەن ماراپاتتالعان.

"ادىرنا" ۇلتتىق پورتالىنىڭ ۇجىمى اقىندى تۋعان كۇنىمەن قۇتتىقتاي وتىرىپ، دەنىنە ساۋلىق، شىعارماشىلىق تابىستار تىلەيدى.

"ادىرنا" ۇلتتىق پورتالى.