قر پرەمەر-ءمينيسترى اسقار مامين Chevron باسشىلىعىمەن كەزدەستى

845

قر پرەمەر-ءمينيسترى اسقار مامين «شەۆرون» (Chevron) كومپانياسىنىڭ ءوندىرۋ ماسەلەلەرى جونىندەگى ۆيتسە-پرەزيدەنتى دجەيمس دجونسونمەن كەلىسسوز جۇرگىزدى. تاراپتار «تەڭىزشەۆرويل» (تشو) بولاشاق كەڭەيتۋ جوباسىن ىسكە اسىرۋ، قاراشىعاناق جوباسىن كەڭەيتۋ جانە كاسپي قۇبىر كونسورتسيۋمىنىڭ قۋاتىن ارتتىرۋ پەرسپەكتيۆاسى ماسەلەلەرىن تالقىلادى.

زاماناۋي ەكولوگيالىق تازا تەحنولوگيالاردى قولدانۋ، الەۋمەتتىك جوبالاردى ىسكە اسىرۋ، دەنساۋلىق ساقتاۋ جانە ەڭبەك قاۋىپسىزدىگى سالاسىندا جوعارى ستاندارتتاردىڭ ساقتالۋىن قامتاماسىز ەتۋ ماسەلەلەرى قارالدى.

«شەۆرون» ءۇش ءىرى جوبادا – تەڭىز (50%), قاراشىعاناق (18%) جانە كاسپي قۇبىر كونسورتسيۋمى (15%) جوبالارىندا اكتيۆتەرى بار قازاقستانداعى اسا ءىرى شەتەلدىك ينۆەستور.

2020 جىلى تشو-دا شيكى مۇناي ءوندىرۋ كولەمى 26,5 ملن توننانى قۇرادى. مەملەكەتكە $6,6 ملرد كولەمىندە تىكەلەي قارجىلىق تولەمدەر جۇزەگە اسىرىلدى، $3,5 ملرد استام سوماعا قازاقستاندىق جەتكىزۋشىلەردىڭ تاۋارلارى مەن قىزمەتتەرى ساتىپ الىندى.

بيىل تشو-دا 26,3 ملن توننا كولەمىندە مۇناي ءوندىرۋ جوسپارلانۋدا. 2021 جىلدىڭ 8 ايىندا مەملەكەتكە تولەمدەر $4,9 ملرد قۇرادى. بولاشاق كەڭەيتۋ جوباسىنىڭ اياقتالۋى 2023 جىلدىڭ سوڭىندا ءوندىرۋ كولەمىن جىلىنا 12 ملن تونناعا ارتتىرۋعا مۇمكىندىك بەرەدى.

تشو گازى اتىراۋ وبلىسىندا پوليپروپيلەن (قۋاتى جىلىنا 500 مىڭ توننا) جانە پوليەتيلەن (جىلىنا 1,25 ملن توننا) وندىرەتىن ەكى ءىرى گاز-حيميا جوباسى ءۇشىن شيكىزات بولىپ وتىر.

كەلىسسوز قورىتىندىسى بويىنشا قر ەنەرگەتيكا مينيسترلىگى مەن «شەۆرون» كومپانياسى اراسىندا قازاقستاندا $248,5 ملن كولەمىندە تىكەلەي ينۆەستيتسيالار قورىن قۇرۋ بويىنشا ءوزارا تۇسىنىستىك تۋرالى مەموراندۋمعا قول قويىلدى.

مەموراندۋم قازاقستاننىڭ مۇناي-گاز سالاسىنداعى، قورشاعان ورتانى قورعاۋ، سونداي-اق اقپاراتتىق جانە تسيفرلىق تەحنولوگيالار سالاسىنداعى تاۋار ءوندىرۋ، جۇمىستاردى ورىنداۋ جانە قىزمەتتەردى ۇسىنۋ جونىندەگى كوممەرتسيالىق كاسىپورىندارعا ينۆەستيتسيا سالۋ جولىمەن ەكونوميكانى جانە جەرگىلىكتى قامتۋدى دامىتۋ ءۇشىن قور قۇرۋدى كوزدەيدى.

قور كاپيتالىن «شەۆرون»-نىڭ قازاقستاندا العان پايداسىنىڭ ءبىر بولىگىنە تەڭ. كەزدەسۋگە ەنەرگەتيكا ءمينيسترى ماعزۇم مىرزاعاليەۆ جانە «قازمۇنايگاز» ۇك» اق باسقارما توراعاسى اليك ايدارباەۆ قاتىستى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى