شىعىس قازاقستان وبلىسىندا ەكى زەينەتكەردى قاتىگەزدىكپەن ءولتىردى دەگەن كۇدىكپەن 37 جاستاعى ەر ادام ۇستالدى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.
2021 جىلدىڭ 25 قاڭتارىندا شىعىس قازاقستان وبلىسى التاي اۋدانى پريبرەجنوە اۋىلىنىڭ تۇرعىندارى كورشىلەرىنىڭ ءۇيى ورتەنىپ جاتقانىنان ويانىپ كەتكەن.
وقيعا ورنىنا كەلگەن ءورت سوندىرۋشىلەر جالىندى ءسوندىرىپ ۇيگە كىرگەن سوڭ، قورقىنىشتى كورىنىستىڭ كۋاسى بولدى.
ەدەندە زورلىق-زومبىلىقپەن ولتىرىلگەن 83 جاستاعى ايەل مەن 74 جاستاعى ەر ادامنىڭ جارتىلاي كۇيگەن مايىتتەرى جاتقان. ولاردىڭ دەنەسىندە كوپتەگەن پىشاق جاراقاتى بولعان.
اتالعان دەرەك بويىنشا قىلمىستىق كودەكستىڭ 99-بابى 2-بولىگى ("ادام ءولتىرۋ") بويىنشا سوتقا دەيىنگى تەرگەۋ باستالدى.
پوليتسيانىڭ حابارلاۋىنشا، قازان ايىندا قىلمىسقا قاتىسى بار كۇدىكتى انىقتالدى. جابىرلەنۋشىلەردى جاقتىرماعان 37 جاستاعى ەر ادام كىسى ولتىرگەن سوڭ ءۇيدى ادەيى ورتەپ، وقيعا ورنىنان قاشىپ كەتكەن.
ەر ادام ءۇي ىشىندەگى پەردەگە وت قويعانىن ايتتى. ال قىلمىس قارۋىن ءۇيدىڭ ماڭىنا لاقتىرىپ كەتكەن.
قازىر كۇدىكتى قاماۋدا، سوتقا دەيىنگى تەرگەۋ جالعاسىپ جاتىر.
“ادىرنا” ۇلتتىق پورتالى
