اقتوبە وبلىسىنىڭ اكىمى وڭداسىن ورازالين جالپىقالالىق كۇزگى اعاش وتىرعىزۋ باعىتىندا ۇيىمداستىرىلعان «ءوز اعاشىڭدى وتىرعىزىپ، قالامىزدىڭ كوگالدانۋىنا ۇلەسىڭدى قوس!» اكتسياسىنا قاتىسىپ، جەمىس اعاشتارىن وتىرعىزدى دەپ حابارلايدى "ادىرنا" ۇلتتىق پورتالى.
شاراعا اقتوبە قالاسىنىڭ اكىمى اسحات شاحاروۆ، وبلىستىق باسقارمالاردىڭ ماماندارى مەن قالا تۇرعىندارى قاتىستى.
"مەملەكەت باسشىسىنىڭ ەلىمىزدەگى ورمان القاپتارىن ۇلكەيتۋ تاپسىرماسىنا وراي، وبلىسىمىزدىڭ اۋماعىن جاسىل جەلەكتەندىرۋ بويىنشا كوپتەگەن جۇمىستار اتقارىلۋدا. ەستەرىڭىزدە بولسا، بيىلدىڭ وزىندە بارلىق اۋدانداردىڭ ورمان شارۋاشىلىقتارىنا جاڭا تەحنيكالار مەن قاجەتتى قۇرال-جابدىقتار ساتىپ الىندى. قالامىزدىڭ كوركىن اشاتىن گۇلدەردى ەگۋ، اعاش-تالداردى وتىرعىزىپ، كۇتىپ-باپتاۋ، ءوسىرۋ ءاربىر تۇرعىننىڭ مىندەتى. ءوز اۋلاسىن كوگالداندىرىپ، جاسىل جەلەكپەن كومكەرۋ - بۇل مادەنيەتتىلىكتىڭ بەلگىسى", - دەدى و.ورازالين.
وبلىس اكىمى سودان كەيىن تۇڭعىش پرەزيدەنت اتىنداعى ساياباقتا ورمان شارۋاشىلىقتارى جانە اۋدان كاسىپكەرلەرىنىڭ قاتىسۋىمەن ۇيىمداستىرىلعان كوپ جىلدىق گۇلدەر مەن كوشەتتەر جارمەڭكەسىنە قاتىسىپ، شارۋا قوجالىقتارىنىڭ جاي-كۇيىمەن تانىستى.
شارا سوڭىندا وڭداسىن ورازالين جالپىقالالىق كۇزگى اعاش وتىرعىزۋ اكتسياسىنىڭ ماڭىزىنا توقتالىپ، وسى شارانى جىلىنا ەكى رەت جۇيەلى تۇردە وتكىزىپ تۇرۋدى ايتىپ ءوتىپ، قالا اكىمىنە بىرقاتار تاپسىرمالار بەردى.
"ادىرنا" ۇلتتىق پورتالى.
