«مەرەيلى وتباسى» بايقاۋىنىڭ لاۋرەاتتارىنا پرەزيدەنت سىيلىعى تابىستالدى

1573
Adyrna.kz Telegram

ونەگەلى وتباسى – ەلدىڭ تۇتقاسى! جاراسىمدى جۇپتار مەن بەرەكە-بىرلىك قونعان وتباسىلار قاشان دا كوپكە ۇلگى. شاڭىراق شاتتىعى مەن ۇلتتىق تاربيەنى ۇلىقتاۋدا ەلباسىنىڭ باستاماسىمەن قولعا الىنعان «مەرەيلى وتباسى» كونكۋرسىنىڭ ماڭىزى ەرەكشە. ءاربىر جانۇيا مەرەيلى، مارتەبەسى بيىك بولسا، قازاق ەلىنىڭ دە ابىرويى اسقاق بولارى انىق.

وتباسى كۇنى قارساڭىندا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ قاتىسۋىمەن ونلاين فورماتتا «مەرەيلى وتباسى» ۇلتتىق كونكۋرسىنىڭ لاۋرەاتتارىن ماراپاتتاۋ ءراسىمى ءوتتى.

مەملەكەتتىك حاتشى سالتاناتتى ءراسىمدى اشىپ، قازاقستان پرەزيدەنتى قاسىم-جومارت توقاەۆتىڭ قۇتتىقتاۋىن وقىپ بەردى. وندا كونكۋرستىڭ وسكەلەڭ ۇرپاقتى تاربيەلەۋدەگى جانە وتباسىلىق قۇندىلىقتاردى نىعايتۋداعى ماڭىزدى ءرولى ايتىلعان.

«مەن قازاقستانداعى ءار شاڭىراق بەرىك بولىپ، ءاربىر اۋلەت باقىتتى عۇمىر كەشكەنىن قالايمىن. سول ءۇشىن وتباسى ساياساتىنا باسا ءمان بەرەمىن. ۇرپاقتىڭ بويىنداعى ادامگەرشىلىك پەن ادالدىق، ەڭبەكقورلىق پەن مەيىرىمدىلىك، ۇلتجاندىلىق پەن وتانشىلدىق سياقتى اسىل قاسيەتتەردىڭ ءبارى، ەڭ الدىمەن، وتباسىندا قالىپتاسادى»، – دەلىنگەن پرەزيدەنت قۇتتىقتاۋىندا.

ايتا كەتەيىك، بيىل كونكۋرستى وتكىزۋدىڭ جاڭا تاسىلدەرى ەنگىزىلدى. سوعان سايكەس ەندى جىل سايىن رەسپۋبليكا بويىنشا 17 ۇزدىك وتباسى انىقتالاتىن بولادى.

«مەرەيلى وتباسى» كونكۋرسىنىڭ جەڭىمپازى شىمكەنت قالاسى بويىنشا «اليەۆتەر وتباسى» بولىپ انىقتالعان ەدى.

قالا اكىمى مۇرات ايتەنوۆ «اليەۆتەر» وتباسىنا پرەزيدەنتتىڭ اتىنان قارجىلاي سەرتيفيكات پەن ديپلومدى سالتاناتتى تۇردە تابىستاپ، تۋعان شاڭىراقتان العان تاربيە – بۇل بارشا حالقىمىزدىڭ تابىستى بولاشاعىنىڭ كەپىلى ەكەنىن ايتتى.

جەڭىمپاز وتباسى اليەۆ باچاك ماحانبەتۇلى– ىشكى ىستەر سالاسىنىڭ قۇرمەتتى ارداگەرى، زەينەتكەر. «ابو» تۇرىك وتباسىلىق ءانسامبلىنىڭ جەتەكشىسى. قحا «بىرلىك» مەدالىنىڭ يەگەرى، اۋىر اتلەتيكادان «سپورت شەبەرى»، «پوليتسيا ۇزدىگى» ءتوس بەلگىسىنىڭ يەگەرى. جۇبايى: اليەۆا شايزار قاسىمقىزى – زەينەتكەر. اليەۆتەردىڭ وتباسىلىق ءومىر تاجىريبەسى – 52 جىل. ءۇش بالاسى، ون نەمەرەسى، 14 شوبەرەسى بار.

ۇلدارى جەكە كاسىپپەن اينالىسادى. نەمەرەلەرى نۇرسۇلتان، ەلسۇلتان جانە بەكسۇلتان ۇلتتىق اسپاپتاردىڭ شەبەر ورىنداۋشىلارى. بۇگىندە 3 ۇرپاقتان تاراعان 5 جانۇيا ءبىر شاڭىراقتىڭ استىندا تاتۋ-ءتاتتى ءومىر سۇرۋدە.

ۇل-قىزدارى مەن نەمەرەلەرى قازاق تىلىندە ءبىلىم الىپ، ۇلتتىق داستۇرلەردى قۇرمەتتەپ، ۇستانىپ كەلەدى. قازاقتاي دارحان ەلدىڭ كەڭدىگىن كورىپ وسكەن وتباسىنىڭ ۇلكەنى ب.اليەۆ پەرزەنتتەرىن تۋىپ وسكەن جەرىنە ايانباي قىزمەت ەتۋگە تاربيەلەپ كەلەدى.

ەسكە سالساق، بايقاۋدىڭ شارتى بويىنشا شىمكەنت قالاسىنىڭ تۇرعىندارى اراسىنان بارلىعى 110 ءوتىنىش قابىلدانعان بولاتىن. بۇل 2019 جىلمەن سالىستىرعاندا 4 ەسە كوپ وتباسى قاتىسقاندىعىن كورسەتىپ وتىر. سونىمەن قاتار، بيىلعى جىلى بايقاۋعا كوپ بالالى جانە جاس وتباسىلار ەكى ەسە كوپ قاتىسقان.

پىكىرلەر