قازاقستاندىق بوكسشى جانقوش تۇراروۆ Vesti.kz تىلشىسىنە بەرگەن سۇحباتىندا سوت ورىنداۋشىمەن بولعان داۋ-داماي تۋرالى ءمان-جايدى ايتىپ بەردى، دەپ حابارلايدى «ادىرنا» ءتىلشىسى.
«كەيبىر باق پەن الەۋمەتتىك جەلىلەر جاعدايدى تولىق بىلمەي، جالعان اقپارات تاراتاتىنى وكىنىشتى. كوپتەگەن سايتتان ءتۇرلى تاقىرىپتار وقىدىم، وندا مەنى ءبىر گانگستەر رەتىندە كورسەتىپتى. جاساندى شۋ كوتەرگەن»،– دەدى ول.
بوكسشى وقيعانىڭ ءمان-جايىن ءتۇسىندىردى.
«مەن كەلگەنىمدە جاعداي تۇسىنىكسىز بولدى. بۇل اپكەمنىڭ ءۇيى. ولار ءۇيدى جاقىندا ساتىپ العان، بۇرىنعى يەسى زاڭسىز قۇرىلىسى بار تۇرعىن ءۇيدى ساتىپ جىبەرگەن. ساتۋ-الۋدىڭ پروتسەسىن ونشا جاقسى بىلە بەرمەيمىن، مۇنى قۇزىرلى ورگاندار انىقتاسىن. جاقىنىڭ مۇنداي جاعدايعا دۋشار بولسا، كىم كومەككە كەلمەيدى. ول جەرگە كەلگەنىمدە ايعاي-شۋ مەن جىلاعان داۋىستار بولدى. ءبارىن توقتاتۋدى تالاپ ەتتىم، ارى قارايعى جانجالعا ارالاسپادىم. كۋاگەرلەردىڭ سوزىنەن سوت ورىنداۋشىسى دا ءوز مىندەتىن كاسىبي اتقارماعانىن جانە دورەكى سويلەگەنىن ءبىلدىم.مەن قاراپايىم جىگىتپىن، جىگىتتىك تۇسىنىكپەن وستىك بارىمىزدە. ونى ۇرىپ-سوعامىن دەپ قورقىتپادىم. ەركەكتەردىڭ اراسىنداعى اڭگىمە بولدى، مەن وعان ءوز ويىمدى ايتتىم. ول مەنى ديكتافونعا جازىپ جاتقانىن ەسكەرتكەن دە جوق. بۇل قانشالىقتى زاڭدى ەكەنىن بىلمەيمىن. ول سوققى الىپ قالعان سوڭ، كەكتەنىپ قالعان سياقتى. ول دا بىرەۋدىڭ اعاسى، ودان دا بىرەۋ ۇلگى الادى-اۋ. ەندى حايپ قۋىپ ءجۇر»،– دەپ مالىمدەدى جانقوش.
«ادىرنا» ۇلتتىق پورتالى
