الەمدىك جانە ءداستۇرلى دىندەر ليدەرلەرى سەزى XIX حاتشىلىعىنىڭ وتىرىسىندا تۇركيا ءدىن ىستەرى باسقارماسىنىڭ توراعاسى ءالي ەرباش يسلام دىنىنە قاتىستى قوعامداعى ماسەلەلەرگە قاتىستى پىكىر ءبىلدىردى.
سەزدە قاتىسۋشىلاردى، ءدىني ۇيىمداردىڭ وكىدەرىن كورگەنىمە قۋانىشتىمىن. 2003 جىلدان باستاپ الەمدىك جانە ءداستۇرلى دىندەر ليدەرلەرى سەزى وتكىزىلىپ كەلەدى. وسى رەتتە قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆقا العىسىمدى بىلدىرگىم كەلەدى. ونىڭ ۇزدىكسىز ەڭبەگى وسىنداي ءىس-شارالاردى وتكىزۋگە زور ۇلەس قوستى. ءاربىر ءدىن وكىلدەرى اراسىنداعى ىنتىماقتاستىقتى دامىتۋعا ۇلەس قوسۋدا. نۇرسۇلتان نازارباەۆ اتاپ وتكەندەي، الەمدىك جانە ءداستۇرلى دىندەر ليدەرلەرى اراسىنداعى وسىنداي ىنتىماقتاستىق فاناتيزمگە، راديكاليزمگە، يسلاموفوبياعا توتەپ بەرۋ ءۇشىن ماڭىزدى، - دەپ اتاپ ءوتتى شەتەلدىك ساراپشى.
ول اتاپ وتكەندەي، قازاقستان 132 ەتنيكالىق توپ تۇراتىن مەملەكەت جانە مۇندا ءار ءتۇرلى ءدىني نانىم-سەنىمدەرى بار ادامدار تۇرادى. سول سەبەپتى مۇنداي سەزد وتكىزۋدىڭ ماڭىزى زور. سوزىنشە، قازاقستان الەمگە ءبىلىمدى، دانالىقتى، سۇيىسپەنشىلىكتى پاش ەتىپ جاتىر.
قازىرگى كەزەڭدە ادامزات كۇردەلى جاعدايدان وتۋدە. اسىرەسە، پاندەميا بۇكىل الەمگە سالدارىن تيگىزدى. ول ادامي قۇندىلىقتاردى ساقتاۋدىڭ ماڭىزدىلىعىن كورسەتىپ جاتىر. سول سەبەپتى ادامزات بەيبىتشىلىككە، كەلىسىمگە ءزارۋ. يسلام – بۇل ادىلدىكتىڭ، مەيىرىمدىلىكتىڭ ءدىنى جانە بارلىق ادام اللانىڭ الدىندا تەڭ. قاسيەتتى قۇران كارىمدە ءادىل، مەيىرىمدى بولۋ ماسەلەلەرى ايتىلعان. بۇل الەمدە بەيبىتشىلىكتى ساقتاۋعا مۇمكىندىك بەرەدى. يسلام ادامزاتتى بەيبىت بولۋعا، ءبىر-بىرىمەن جاۋلاسپاۋعا شاقىرادى، - دەپ ايتتى ءالي ەرباش.
تۇركيا ءدىن ىستەرى باسقارماسىنىڭ توراعاسى قازىرگى كەزدە يسلامدى سىناۋ، قارالاۋ، ياعني «يسلاموفوبيا» تەرمينى بارىن ايتتى.
يسلاموفوبيا – جاساندى، جالعان ءسوز. ويتكەنى بىردە-ءبىر جاعىمسىز ءسوز يسلام ءدىنىنىڭ جانىندا تۇرا المايدى. يسلام تەك قانا بەيبىتشىلىك پەن كەلىسىمگە ۇندەيدى. وكىنىشكە قاراي، بۇگىنگى كۇنى قوعامدا ناسىلشىلدىكتى، كەمسىتۋشىلىكتى بايقايمىز. ونىڭ سالدارى مۇسىلماندارعا قارسىلىقتىڭ كوبەيگەنىن كورسەتەدى. سەنىم مەن ىنتىماقتاستىق بۇزاتىن، تەرروريزمگە شاقىراتىندار يسلامعا سۇيەنە المايدى. ويتكەنى يسلام ءدىنى مەيىرىمدىلىكتىڭ، ادىلدىكتىڭ ءدىنى. يسلام جونىندەگى تۇسىنىك اشىق بولۋى كەرەك، - دەپ تولىقتىردى ءالي ەرباش.
ەسكە سالا كەتەيىك، ەلوردادا الەمدىك جانە ءداستۇرلى دىندەر ليدەرلەرى سەزى XIX حاتشىلىعىنىڭ وتىرىسى ءوتىپ جاتىر.
"ادىرنا" ۇلتتىق پورتالى
