Álemdik jáne dástúrli dinder lıderleri Sezi XIX Hatshylyǵynyń otyrysynda Túrkııa Din isteri basqarmasynyń tóraǵasy Álı Erbash Islam dinine qatysty qoǵamdaǵy máselelerge qatysty pikir bildirdi.
Sezde qatysýshylardy, dinı uıymdardyń ókiderin kórgenime qýanyshtymyn. 2003 jyldan bastap Álemdik jáne dástúrli dinder lıderleri Sezi ótkizilip keledi. Osy rette Qazaqstannyń Tuńǵysh Prezıdenti – Elbasy Nursultan Nazarbaevqa alǵysymdy bildirgim keledi. Onyń úzdiksiz eńbegi osyndaı is-sharalardy ótkizýge zor úles qosty. Árbir din ókilderi arasyndaǵy yntymaqtastyqty damytýǵa úles qosýda. Nursultan Nazarbaev atap ótkendeı, Álemdik jáne dástúrli dinder lıderleri arasyndaǵy osyndaı yntymaqtastyq fanatızmge, radıkalızmge, ıslamofobııaǵa tótep berý úshin mańyzdy, - dep atap ótti sheteldik sarapshy.
Ol atap ótkendeı, Qazaqstan 132 etnıkalyq top turatyn memleket jáne munda ár túrli dinı nanym-senimderi bar adamdar turady. Sol sebepti mundaı Sezd ótkizýdiń mańyzy zor. Sózinshe, Qazaqstan álemge bilimdi, danalyqty, súıispenshilikti pash etip jatyr.
Qazirgi kezeńde adamzat kúrdeli jaǵdaıdan ótýde. Ásirese, pandemııa búkil álemge saldaryn tıgizdi. Ol adamı qundylyqtardy saqtaýdyń mańyzdylyǵyn kórsetip jatyr. Sol sebepti adamzat beıbitshilikke, kelisimge zárý. Islam – bul ádildiktiń, meıirimdiliktiń dini jáne barlyq adam Allanyń aldynda teń. Qasıetti Quran kárimde ádil, meıirimdi bolý máseleleri aıtylǵan. Bul álemde beıbitshilikti saqtaýǵa múmkindik beredi. Islam adamzatty beıbit bolýǵa, bir-birimen jaýlaspaýǵa shaqyrady, - dep aıtty Álı Erbash.
Túrkııa Din isteri basqarmasynyń tóraǵasy qazirgi kezde Islamdy synaý, qaralaý, ıaǵnı «ıslamofobııa» termıni baryn aıtty.
Islamofobııa – jasandy, jalǵan sóz. Óıtkeni birde-bir jaǵymsyz sóz Islam dininiń janynda tura almaıdy. Islam tek qana beıbitshilik pen kelisimge úndeıdi. Ókinishke qaraı, búgingi kúni qoǵamda násilshildikti, kemsitýshilikti baıqaımyz. Onyń saldary musylmandarǵa qarsylyqtyń kóbeıgenin kórsetedi. Senim men yntymaqtastyq buzatyn, terrorızmge shaqyratyndar Islamǵa súıene almaıdy. Óıtkeni ıslam dini meıirimdiliktiń, ádildiktiń dini. Islam jónindegi túsinik ashyq bolýy kerek, - dep tolyqtyrdy Álı Erbash.
Eske sala keteıik, elordada Álemdik jáne dástúrli dinder lıderleri Sezi XIX Hatshylyǵynyń otyrysy ótip jatyr.
"Adyrna" ulttyq portaly
