وزبەكستاندا اكادەميك ۆ.ۆاحيدوۆ اتىنداعى رەسپۋبليكالىق مامانداندىرىلعان حيرۋرگيا عىلىمي -پراكتيكالىق مەديتسينالىق ورتالىعى بازالىق قارجىلاندىرۋ جۇيەسى نەگىزىندە جۇمىس ىستەيتىن ادام اعزالارى مەن تىندەرىن ترانسپلانتاتسيالاۋعا ارنالعان عىلىمي زەرتحانا اشادى. بۇل تۋرالى پرەزيدەنت شاۆكات ميرزيوەۆ اعىمداعى جىلدىڭ 4 قازانىندا قول قويعان جارلىقتا ايتىلعان.
قۇجات ادام اعزاسى مەن تىندەرىن ترانسپلانتاتسيالاۋ حيرۋرگيالىق ورتالىعىنىڭ بىرقاتار قوسىمشا فۋنكتسيالارىن انىقتايدى: ترانسپلانتولوگيا سالاسىنداعى ىرگەلى جانە پراكتيكالىق زەرتتەۋلەردى ەنگىزۋ جانە يننوۆاتسيالىق جوبالاردى ازىرلەۋ، ترانسپلانتاتسيالاۋدىڭ جوعارى تەحنولوگيالىق وپەراتسيالارىن ەنگىزۋ ادىستەرىن زەرتتەۋ جانە ەنگىزۋ، شەت مەملەكەتتەردىڭ مامانداندىرىلعان عىلىمي ۇيىمدارىمەن، ورتالىقتارىمەن جانە ساراپشىلارىمەن ىنتىماقتاستىق ورناتۋ جانە بىرلەسكەن زەرتتەۋلەردى ۇيىمداستىرۋ، ترانسپلانتاتسيا سالاسىنداعى بىلىكتى عىلىمي كادرلاردى دايىنداۋعا كومەك كورسەتۋ.
قۇجات سونىمەن قاتار 2021-2022 وقۋ جىلىنان باستاپ حيرۋرگيا ورتالىعىندا تاشكەنت مەديتسينالىق اكادەمياسىنىڭ حيرۋرگيا جانە ترانسپلانتولوگيا كافەدراسىن قۇرۋدى قاراستىرادى. حيرۋرگيالىق ورتالىقتى مودەرنيزاتسيالاۋ ءۇشىن ينۆەستيتسيالار جانە سىرتقى ساۋدا مينيسترلىگىنە دەنساۋلىق ساقتاۋ مينيسترلىگىمەن بىرگە ءبىر اپتا ىشىندە حالىقارالىق قارجى ينستيتۋتتارى مەن شەتەلدىك ۇكىمەتتىك قارجى ۇيىمدارىنان 11 ميلليون اقش دوللارى كولەمىندە قاراجات تارتۋ بويىنشا شارالار قابىلداۋ تاپسىرىلدى.
"ادىرنا" ۇلتتىق پورتالى
