وزبەكستان تۇركىمەنستاندا اۆتوكولىك پەن ەلەكتروتەحنيكالىق بۇيىمدار شىعارۋدى ۇيىمداستىرماق. بۇل تۋرالى وزبەكستان پرەمەر-ءمينيسترىنىڭ ورىنباسارى، ينۆەستيتسيالار جانە سىرتقى ساۋدا ءمينيسترى ساردور ومىرزاقوۆ تاشكەنتتە وتكەن وزبەك-تۇرىكمەن فورۋمىندا ايتتى.
وزبەكستان پرەمەر-ءمينيسترىنىڭ ورىنباسارى ەكى ەل اراسىنداعى ەكونوميكالىق قارىم-قاتىناس بىرنەشە باعىتتا دامۋى ءتيىس ەكەنىن اتاپ ءوتتى: ساۋدا، وندىرىستىك كووپەراتسيا، كولىك-لوگيستيكالىق سەرىكتەستىك پەن وڭىرارالىق ىنتىماقتاستىق.
فورۋمدا بىرلەسكەن كاسىپورىندار اشۋ تۋرالى كەلىسىمگە قول جەتكىزىلدى. «ءوزاۆتوسانوات» پەن «تۇركىمەنستان-موتورس» كومپانيالارى اراسىندا تۇركىمەنستاندا ارنايى اۆتوكولىك ءوندىرىسىن قۇرۋ تۋرالى كەلىسىمگە قول قويىلدى. ءبىرىنشى جىلى كاسىپورىن 10 مىڭ بىرلىككە دەيىن اۋىل شارۋاشىلىعى تەحنيكاسى مەن تىركەمەلەر شىعارۋدى جوسپارلاپ وتىر، ال 4-5 جىل ىشىندە جىلىنا 50 مىڭ بىرلىككە دەيىن جەتەدى دەپ كۇتىلۋدە.
بۇعان دەيىن حابارلانعانداي، دۇيسەنبى كۇنى تاشكەنتتە پرەزيدەنت گۋربانگۋلى بەردىمۇحامەدوۆتىڭ ەلگە رەسمي ساپارى اياسىندا وزبەك-تۇرىكمەن ەكونوميكالىق فورۋمى ءوتتى. فورۋم اياسىندا ەكى ەل دەلەگاتسياسىنىڭ مۇشەلەرى 13 ەكىجاقتى قۇجاتقا قول قويدى، ونىڭ ىشىندە ەكسپورتتىق-يمپورتتىق وپەراتسيالاردى جۇزەگە اسىرۋ تۋرالى جالپى سوماسى 13,5 ملن دوللارلىق كەلىسىم بار.
"ادىرنا" ۇلتتىق پورتالى
