نۇر-سۇلتاندا 50 جاستان اسقان ءبىر توپ ايەل ەڭبەك مينيسترلىگىنىڭ الدىندا ميتينگكە شىقتى. قولدارىنا «زەينەتكە شىعۋ جاسىن 58 جاسقا قايتارۋدى تالاپ ەتەمىز» دەپ جازىلعان پلاكات الىپ شىققان ولار وزدەرى جازعان گيمندى ورىنداپ، «بيلىك زەينەتكە شىعۋ جاسىن 58 جاسقا قايتارسىن» دەپ تالاپ قويدى دەپ حابارلايدى "ادىرنا" ۇلتتىق پورتالى "31 ارناعا" سىلتەمە جاساپ.
ەڭبەك مينيسترىلىگى عيماراتىنىڭ الدىنا جينالعان، باسىنا اق ورامال تاققان ايەلدەر قولدارىنا «زەينەتكە شىعۋ جاسىن 58 جاسقا قايتارۋدى تالاپ ەتەمىز» دەگەن پلاكاتتى ۇستاپ شىققان. ولار بيلىكتىڭ نازارىن اۋداراتىن باسقا امال قالماعانىن ايتادى. ويتكەنى، بۇعان دەيىن «نۇر وتان» پارتياسىنا، پرەزيدەنتكە جانە باسقا دا قۇزىرلى ورگاندارعا جازعان حاتتارىنا جاۋاپ الماپتى.
– 50 جاستان كەيىن دەنساۋلىق ناشارلايدى، جۇمىس تا تابىلا بەرمەيدى. زەينەتكە شىعۋ جاسىن ۇلعايتقاندا ادامداردىڭ ءومىر ءسۇرۋ جاعدايىن ەسكەرمەگەن. ءبىزدى ەستىسىن دەپ ادەيى قارتتار كۇنىندە وسىلاي ميتينگىگە شىقتىق. ايەلدەردىڭ زەينەتكە شىعۋ جاسى بۇرىنعىداي 58 جاس بولۋىن تالاپ ەتەمىز، — دەيدى مايكەن بيگارىستانوۆا.
ال كەنجە سەمباەۆانىڭ ايتۋىنشا، 50 جاستان كەيىن ايەل بولسىن، ەركەك بولسىن، اۋىرادى، ەڭبەككە قابىلەتتىلىگى تومەندەيدى.
— ەلىمىزدە ايەلدەردىڭ ءبارى كابينەتتە رۋچكا ۇستاپ، كومپيۋتەردىڭ الدىندا وتىرمايدى. كوپ ايەلدەر ەدەن جۋادى، كوشە سىپىرادى، اۋىر جۇمىس جاسايدى. ولارعا وتە قيىن 63-كە دەيىن جەتۋ. زەينەتكە شىعۋ جاسىن ءبىزدىڭ ۇكىمەت ەۋروپاعا قاراپ بەكىتتى. ال ءبىزدىڭ ءومىر ءسۇرۋ جاعدايىمىز ەۋروپاعىدان الىس، — دەيدى ول.
مينيسترلىك الدىندا اندەتىپ تۇرعان ايەلدەردى پوليتسيا قىزمەتكەرلەرى باقىلاپ تۇرعان. ءبىرازدان كەيىن ولاردى مينيسترلىك قىزمەتكەرلەرى عيماراتقا كىرگىزگەن سوڭ، ءبىر توپ ايەلدىڭ تالابى ۇزاق ديسكۋسسياعا اينالدى.
– ءبىز ماسەلەدەن قاشپايمىز. سىزدەردىڭ تالابىڭىز بويىنشا ۆيتسە-مينيستر اقمادي سارباسوۆ جۇمىس ىستەپ جاتىر. ول قازىر ءىسساپاردا ءجۇر. تالابىڭىز ەسكەرۋسىز قالمايدى، — دەدى جينالعاندارعا قر ەڭبەك جانە حالىقتى الەۋمەتتىك قورعاۋ مينيسترلىگى زەينەتاقىمەن قامتاماسىز ەتۋ دەپارتامەنتىنىڭ ديرەكتورى ۆيكتوريا شەگاي.
ال ەڭبەك جانە حالىقتى الەۋمەتتىك قورعاۋ ءمينيسترىنىڭ كەڭەسشىسى شىڭعىسبەك سۇلتانبەكوۆ ايەلدەردىڭ تالابىن مينيسترگە جەتكىزەمىن دەپ ۋادە ەتتى. دەسە دە، زاڭدى وزگەرتۋ ءۇشىن 3-4 اي ۋاقىت كەتەتىنىن ەسكەرتتى.
"ادىرنا" ۇلتتىق پورتالى.
