Nur-Sultanda 50 jastan asqan bir top áıel Eńbek mınıstrliginiń aldynda mıtıngke shyqty. Qoldaryna «Zeınetke shyǵý jasyn 58 jasqa qaıtarýdy talap etemiz» dep jazylǵan plakat alyp shyqqan olar ózderi jazǵan gımndi oryndap, «bılik zeınetke shyǵý jasyn 58 jasqa qaıtarsyn» dep talap qoıdy dep habarlaıdy "Adyrna" ulttyq portaly "31 arnaǵa" silteme jasap.
Eńbek mınıstriligi ǵımaratynyń aldyna jınalǵan, basyna aq oramal taqqan áıelder qoldaryna «Zeınetke shyǵý jasyn 58 jasqa qaıtarýdy talap etemiz» degen plakatty ustap shyqqan. Olar bıliktiń nazaryn aýdaratyn basqa amal qalmaǵanyn aıtady. Óıtkeni, buǵan deıin «Nur Otan» partııasyna, Prezıdentke jáne basqa da quzyrly organdarǵa jazǵan hattaryna jaýap almapty.
– 50 jastan keıin densaýlyq nasharlaıdy, jumys ta tabyla bermeıdi. Zeınetke shyǵý jasyn ulǵaıtqanda adamdardyń ómir súrý jaǵdaıyn eskermegen. Bizdi estisin dep ádeıi Qarttar kúninde osylaı mıtıngige shyqtyq. Áıelderdiń zeınetke shyǵý jasy burynǵydaı 58 jas bolýyn talap etemiz, — deıdi Maıken Bıgarystanova.
Al Kenje Sembaevanyń aıtýynsha, 50 jastan keıin áıel bolsyn, erkek bolsyn, aýyrady, eńbekke qabilettiligi tómendeıdi.
— Elimizde áıelderdiń bári kabınette rýchka ustap, kompıýterdiń aldynda otyrmaıdy. Kóp áıelder eden jýady, kóshe sypyrady, aýyr jumys jasaıdy. Olarǵa óte qıyn 63-ke deıin jetý. Zeınetke shyǵý jasyn bizdiń úkimet Eýropaǵa qarap bekitti. Al bizdiń ómir súrý jaǵdaıymyz Eýropaǵydan alys, — deıdi ol.
Mınıstrlik aldynda ándetip turǵan áıelderdi polıııa qyzmetkerleri baqylap turǵan. Birazdan keıin olardy mınıstrlik qyzmetkerleri ǵımaratqa kirgizgen soń, bir top áıeldiń talaby uzaq dıskýssııaǵa aınaldy.
– Biz máseleden qashpaımyz. Sizderdiń talabyńyz boıynsha vıe-mınıstr Aqmadı Sarbasov jumys istep jatyr. Ol qazir issaparda júr. Talabyńyz eskerýsiz qalmaıdy, — dedi jınalǵandarǵa QR Eńbek jáne halyqty áleýmettik qorǵaý mınıstrligi zeınetaqymen qamtamasyz etý departamentiniń dırektory Vıktorııa Shegaı.
Al Eńbek jáne halyqty áleýmettik qorǵaý mınıstriniń keńesshisi Shyńǵysbek Sultanbekov áıelderdiń talabyn mınıstrge jetkizemin dep ýáde etti. Dese de, zańdy ózgertý úshin 3-4 aı ýaqyt ketetinin eskertti.
"Adyrna" ulttyq portaly.
