اقتوبەدە ءورشىپ تۇرعان ورامال داۋى بۇگىن سوتقا دەيىن جەتتى. قىزدارىمدى باستارىنا ورامال تاققانى ءۇشىن مەكتەپكە كىرگىزبەي وتىر دەگەن اتا-انا قالاداعى №10 مەكتەپتىڭ ديرەكتورىن سوتقا بەردى. مەكتەپتىڭ تالابى مەن فورماسىنا باعىنعىسى كەلمەيتىن اتا - انانىڭ ايتۋىنشا قىزدارى ءۇشىنشى توقسان باستالعالى بەرى ساباققا كىرگىزىلمەگەن.
مەكتەپ ديرەكتورىنان باستاپ ءبىلىم باسقارمالارىنا دەيىن سوتقا سۇيرەتكەن قايرات جارماعامبەتوۆ مەكتەپ باسشىلىعى ەكى قىزىما بىردەي قىسىم كورسەتىپ وتىر دەيدى. ايتۋىنشا، باستارىنداعى ورامالى ءۇشىن قىزدارى مەكتەپتەن شەتتەتىلىپ، ورتا ءبىلىم الۋلارىنا كەدەرگى جاسالعان.
قايرات جارماعامبەتوۆ، شاعىمدانۋشى:
– ساباققا كەلگەن قىزدارىمدى مەكتەپ ديرەكتورى گۇلايىم يمانوۆا فويەدە تىكەلەي ءوزى قارسى الىپ، قىزدارىمنىڭ ورامال تارتاتىنىنا بايلانىستى مەكتەپكە فورماسىنا ءدىني ەلەمەنتتەردى قوستى دەپ ايىپتاپ، مەكتەپكە كىرگىزبەدى. ورتا مەكتەپتىڭ ديرەكتورى گۇلايىم يمانوۆانىڭ قىزدارىم مىندەتتى ورتا ءبىلىم الۋ قۇقىعىنا شەكتەۋ قويعاندىعىن زاڭسىز دەپ تانۋدى سۇرايمىن.
سوت الدىنا جاۋاپكەر رەتىندە شاقىرتىلعان مەكتەپ ديرەكتورى وقۋشى قىزداردىڭ وقۋ ۇلگەرىمى مەن ءتارتىبى جاقسى ەكەنىن ايتادى. الايدا بارشاعا ورتاق مەكتەپ فورماسىن ساقتاماعانى ءۇشىن مەكتەپكە كىرگىزە المايمىز دەيدى. وعان ارنايى بەكىتىلگەن تالاپ بار ەكەنىن تاعى ءبىر ەسكە سالدى.
گۇلايىم يمانوۆا، اقتوبە قالاسى №10 ورتا مەكتەبىنىڭ ديرەكتورى:
– ءۇش وقۋشى ورامال تارتاتىن، وسى اتا - انالارعا حابارلاما بەردىك، قازان، قاراشا، قاڭتار ايىندا بەرىلدى. وسى مەكتەپ فورماسىن ياعني، قر ءبىلىم جانە عىلىم مينيسترىلىگى بەكىتكەن مەكتەپ فورماسىن ساقتامايتىن بولسا، مەكتەپكە كىرگىزە المايمىز دەپ حابارلاما بەردىك، وعان دەيىن ءتۇسىندىرۋ جۇمىستارى ءجۇردى. قازان ايىندا ءبىز مەكتەپ قامقورشىلىعى وتىرىسىندا ايتتىق، مەكتەپ فورماسىندا باس كيىمنىڭ جوق ەكەنى ەسكەرتىلدى. سوندىقتان ورامالداردى شەشىپ كىرۋى سۇرالدى.
سوتتا كۋالەردەن بولەك ساراپشىلاردى دا تىڭدادى. قالالىق ءبىلىم ءبولىمى، ءبىلىم بەرۋ ساپاسىنا جاۋاپتى مەكەمەلەردەن شاقىرىلعاندار ءبىر اۋىزدان مەكتەپ ديرەكتورىنىڭ تالابى زاڭدى ەكەنىن ايتادى. سوتتىڭ كەلەسى وتىرىسى 15 اقپانعا بەلگىلەندى.
جانار قوجانوۆا، باعدات بايمۋرزين،
31 ارناداعى "ينفورمبيۋرو" باعدارلاماسى
