Aqtóbede órship turǵan oramal daýy búgin sotqa deıin jetti. Qyzdarymdy bastaryna oramal taqqany úshin mektepke kirgizbeı otyr degen ata-ana qaladaǵy №10 mekteptiń dırektoryn sotqa berdi. Mekteptiń talaby men formasyna baǵynǵysy kelmeıtin ata - ananyń aıtýynsha qyzdary úshinshi toqsan bastalǵaly beri sabaqqa kirgizilmegen.
Mektep dırektorynan bastap bilim basqarmalaryna deıin sotqa súıretken Qaırat Jarmaǵambetov mektep basshylyǵy eki qyzyma birdeı qysym kórsetip otyr deıdi. Aıtýynsha, bastaryndaǵy oramaly úshin qyzdary mektepten shettetilip, orta bilim alýlaryna kedergi jasalǵan.
QAIRAT JARMAǴAMBETOV, shaǵymdanýshy:
– Sabaqqa kelgen qyzdarymdy mektep dırektory Gúlaıym Imanova foıede tikeleı ózi qarsy alyp, qyzdarymnyń oramal tartatynyna baılanysty mektepke formasyna dinı elementterdi qosty dep aıyptap, mektepke kirgizbedi. Orta mekteptiń dırektory Gúlaıym Imanovanyń qyzdarym mindetti orta bilim alý quqyǵyna shekteý qoıǵandyǵyn zańsyz dep tanýdy suraımyn.
Sot aldyna jaýapker retinde shaqyrtylǵan mektep dırektory oqýshy qyzdardyń oqý úlgerimi men tártibi jaqsy ekenin aıtady. Alaıda barshaǵa ortaq mektep formasyn saqtamaǵany úshin mektepke kirgize almaımyz deıdi. Oǵan arnaıy bekitilgen talap bar ekenin taǵy bir eske saldy.
GÚLAIYM IMANOVA, Aqtóbe qalasy №10 orta mektebiniń dırektory:
– Úsh oqýshy oramal tartatyn, osy ata - analarǵa habarlama berdik, qazan, qarasha, qańtar aıynda berildi. Osy mektep formasyn ıaǵnı, QR bilim jáne ǵylym mınıstriligi bekitken mektep formasyn saqtamaıtyn bolsa, mektepke kirgize almaımyz dep habarlama berdik, oǵan deıin túsindirý jumystary júrdi. Qazan aıynda biz mektep qamqorshylyǵy otyrysynda aıttyq, mektep formasynda bas kıimniń joq ekeni eskertildi. Sondyqtan oramaldardy sheship kirýi suraldy.
Sotta kýálerden bólek sarapshylardy da tyńdady. Qalalyq bilim bólimi, bilim berý sapasyna jaýapty mekemelerden shaqyrylǵandar bir aýyzdan mektep dırektorynyń talaby zańdy ekenin aıtady. Sottyń kelesi otyrysy 15 aqpanǵa belgilendi.
Janar Qojanova, Baǵdat Baımýrzın,
31 arnadaǵy "Informbıýro" baǵdarlamasy
