بۇگىندە قازاقستاندىقتاردىڭ تۇركيادا تەگىن ءبىلىم الۋىنا بارلىق جاعداي جاسالعان. بۇل مەملەكەتتىڭ جوعارى ءبىلىم بەرۋ جۇيەسى بەكىتىلگەن ستاندارتتارعا تولىق سايكەس كەلەدى. ەل اۋماعىندا 200-دەن استام جوعارى وقۋ ورنى بار، ونىڭ 130-ى مەملەكەتتىك. 9 تۇرىك ۋنيۆەرسيتەتى الەمنىڭ ۇزدىك جوعارى وقۋ ورىندارىنىڭ رەيتينگىنە كىرەدى. وقۋ جىلى قازاقستانداعىداي ەكى سەمەسترگە بولىنەدى.
تۇركيادا وقۋدىڭ نەگىزگى ارتىقشىلىقتارى
1. وقۋ باعاسى قولجەتىمدى. تۇركيانىڭ كوپتەگەن ۋنيۆەرسيتەتى شەتەلدىكتەرگە ءتۇرلى جەڭىلدىكتەردى ۇسىنادى. مىسالى، ءسىز تۇرىك تىلىندە جوعارى ءبىلىم الساڭىز ءhام بەلسەندى ستۋدەنت اتانساڭىز، گرانتتار مەن ستيپەنديالاردى ۇتىپ الۋ مۇمكىندىگىنە يە بولاسىز. مەملەكەتتىك جوعارى وقۋ ورىندارىندا تۇرىك تىلىندە وقۋ جىلىنا $240-750, اعىلشىن تىلىندە وقۋ $450-1 500, جەكە جوعارى وقۋ ورىندارىندا وقۋ $1 000 باستالادى.
2. ساپالى ءبىلىم. تۇركيانىڭ بارلىق جوعارى وقۋ ورنى قازىرگى زامانعى ەۋروپالىق ءبىلىم بەرۋ ستاندارتتارىنا سايكەس كەلەدى. سونداي-اق بۇل ەل ستۋدەنتتەرىنە شەتەلدە باعالاناتىن ديپلومداردى تابىستايدى.
3. قازاقستان مەن تۇركيا مادەنيەتىنىڭ ۇقساستىعى. بۇل بەيىمدەلۋ پروتسەسىن جەڭىلدەتىپ، ستۋدەنتتەرءدىڭ جەرگىلىكتى حالىقپەن وڭاي، تەز جانە ءتيىمدى قارىم-قاتىناس جاساۋىنا, جاڭا تانىستار مەن ىسكەرلىك بايلانىستار ورناتۋىناسەپتىگىن تيگىزەدى.
4. قازاقستاننان كەلگەن ستۋدەنتتەر ءۇشىن قۇجاتتاردى قابىلداۋدىڭ جەڭىلدەتىلگەن پروتسەسى. تۇركيانىڭ ءبىرشاما جوو-سى قازاقستاندىق اتتەستاتتار مەن ديپلومداردى نوستريفيكاتسيالاۋدى تالاپ ەتپەيدى. ول قۇجاتتاردى تاپسىرۋ پروتسەسىن ايتارلىقتاي جەڭىلدەتەدى جانە تيىسىنشە ستۋدەنتتەردىڭ وقۋعا ءتۇسۋ پايىزىن ارتتىرادى.
وقۋ مەرزىمى
تۇركياداعى وقۋ باعدارلامالارى مىناداي تۇردە جالعاسادى:
1) باكالاۆريات ماماندىققا بايلانىستى 3-4 جىلعا سوزىلادى;
2) ماگيستراتۋرادا وقۋ 2 جىلدى قۇرايدى;
3) PhD دوكتورانتۋرا 2 جىلدان 4 جىلعا دەيىن سوزىلادى.
ستۋدەنتتەر جىلىنا ەكى رەت دەمالىسقا شىعادى.
تۇركيا قازاقستاندىقتار ءۇشىن قانداي ستيپەنديالار مەن ءبىلىم گرانتتارىن ۇسىنادى؟
«Türkiye Bursları» باعدارلاماسى
Türkiye Bursları – بۇل تۇركيا ۇكىمەتىنىڭ بىرەگەي ستيپەنديالىق باعدارلاماسى. ول شەتەلدىك ستۋدەنتتەرگە ەلدەگى ۋنيۆەرسيتەتتەردىڭ بىرىندە تەگىن ءبىلىم الۋعا مۇمكىندىك بەرەدى. باعدارلامانىڭ ايتارلىقتاي قيىن تالابى جوق. قۇجاتتارىڭىزدى ونلاين تۇردە وتكىزىپ، ءوتىنىشتى سايت ارقىلى تولتىراسىز. سونداي-اق تالاپكەرگە تۇرىك نەمەسە اعىلشىن ءتىلىن ءبىلۋ مىندەتتەلمەيدى. شەتەلدىك ستۋدەنتتەر ءبىر جىل بويى ءتىل جەتىلدىرۋ كۋرستارىنا قاتىسا الادى. ال ەگەر ءتىلدى جاقسى مەڭگەرگەن بولساڭىز، وقۋدى بىردەن باستاپ كەتە الاسىز.
گرانت وقۋ اقىسىن، اي سايىنعى ستيپەنديانى، مەديتسينالىق ساقتاندىرۋدى، تەگىن جاتاقحانا مەن ەكى مەزگىل تاماقتى قامتامىز ەتەدى.
ستيپەندياعا ارنالعان كونكۋرسقا كەم دەگەندە تولىق ورتا ءبىلىمى بار كەز كەلگەن قازاقستاندىق قاتىسا الادى. ءوتىنىشتى 21 جاسقا دەيىنگى (باكالاۆرياتقا ءتۇسۋ ءۇشىن) نەمەسە 30 جاسقا دەيىنگى (ماگيستراتۋراعا ءتۇسۋ ءۇشىن) ازاماتتار بەرە الادى.
ءوتىنىم بەرۋشى سايتقا مىناداي قۇجاتتاردى جۇكتەپ، جىبەرۋى ءتيىس:
– تولقۇجات كوشىرمەسى;
– پاسپورت فورماتىنداعى فوتوسۋرەت;
– ورتا ءبىلىم تۋرالى اتتەستاتتىڭ كوشىرمەسى;
– ترانسكريپت باعالارى;
– ديپلومدار مەن سەرتيفيكاتتاردىڭ كوشىرمەلەرى (بولعان جاعدايدا);
اي سايىنعى تولەنەتىن شاكىرتاقى مولشەرى:
باكالاۆر — 700 تۇرىك ليراسى (1 تۇرىك ليراسى - 47,91 تەڭگە);
ماگيستراتۋرا — 950 تۇرىك ليراسى;
دوكتورانتۋرا — 1400 تۇرىك ليراسى.
«مەۆلانا» الماسۋ باعدارلاماسى
تۇركياداعى ءبىلىم بەرۋ سالاسىنداعى باستى باعدارلامالاردىڭ ءبىرى – «مەۆلانا». ونىڭ باستى ماقساتى - تۇرىك جوعارى وقۋ ورىندارىنىڭ جانە باسقا ەلدەردىڭ جوعارى وقۋ ورىندارىنىڭ قىزمەتكەرلەرى مەن ستۋدەنتتەرى اراسىندا اكادەميالىق الماسۋ. قازاقستاندىقتار كەم دەگەندە 1 سەمەستر (4 اي) تەگىن وقي الادى.
كونكۋرسقا قاتىسۋ ءۇشىن باكالاۆر ستۋدەنتتەرىنىڭ GPA ورتاشا بالى 2,5-4 اراسىندا بولۋى قاجەت. ال ماگيستراتۋرا مەن دوكتورانتۋراعا GPA ورتاشا بالى 3-تەن اسقاندار ءوتىنىش بەرە الادى. ءوتىنىشتى سايت ارقىلى تولتىراسىز.
"حالىقارالىق باعدارلامالار ورتالىعى"اق سەرىكتەستەرىنىڭ ستيپەنديالارى
سوڭعى جىلدارى "حالىقارالىق باعدارلامالار ورتالىعى" اق بىرقاتار بەدەلدى تۇرىك ۋنيۆەرسيتەتىمەن قازاقستاندىق ستۋدەنتتەرگە قوسىمشا ستيپەنديالار مەن گرانتتار بەرۋ تۋرالى كەلىسىم جاساستى.مىسالى، سابانجي تۇرىك ۋنيۆەرسيتەتى قازاقستاندىقتارعا باكالاۆريات، ماگيستراتۋرا نەمەسە دوكتورانتۋرادا وقۋ قۇنىنىڭ 25%، 50%، 75% نەمەسە 100% قامتيتىن ستيپەنديالاردى ۇسىنادى.
ستيپەنديا كونكۋرسىنا قاتىسۋ ءۇشىن تومەندەگىدەي قۇجاتتار قاجەت:
– ءوتىنىم;
– تولقۇجات كوشىرمەسى;
– ورتا ءبىلىم تۋرالى اتتەستاتتىڭ كوشىرمەسى:
– ترانسكريپت باعالارى;
– SAT ەمتيحان ناتيجەلەرىنىڭ كوشىرمەسى.
"بولاشاق" باعدارلاماسى
"بولاشاق" باعدارلاماسى - تۇركيادا تەگىن ءبىلىم الۋدىڭ تاعى ءبىر مۇمكىندىگى. ول شەتەلدىك جەتەكشى ۋنيۆەرسيتەتتەردىڭ ماگيستراتۋراسى مەن دوكتورانتۋراسىندا وقۋعا مۇمكىندىك سىيلايدى. ستيپەنديا بايقاۋىنا قاتىسۋ ءۇشىن ستۋدەنت باسىم ماماندىقتاردىڭ ءبىرىن تاڭداپ، قاجەتتى قۇجاتتاردى تاپسىرۋى قاجەت. اعىلشىن ءتىلىن جەتىك ءبىلۋ ماڭىزدى. كەلىسىم-شارتقا سايكەس، تۇلەكتەر مىندەتتى تۇردە قازاقستانعا ورالىپ، كەيبىرى ءۇش جىل، ەندى ءبىرى بەس جىل ماماندىعى بويىنشا جۇمىس ىستەۋى ءتيىس.
وكىنىشكە قاراي، شەتەلدىك ستۋدەنتتەر وقۋ كەزىندەمەملەكەتتىك نەمەسە جەكە مەكەمەلەردە رەسمي جۇمىسقا ورنالاسا المايدى. الايدا، تۇرىك ۋنيۆەرسيتەتتەرى ءبىلىم الۋشىلارىنا كافەدرا مەن كىتاپحانالاردا جۇمىس ىستەۋگە نەمەسە كامپۋستا عىلىمي قىزمەتپەن اينالىسۋعا مۇمكىندىك بەرەدءى.
ديانا اسان،
«ادىرنا» ۇلتتىق پورتالى
