ماڭعىستاۋ وبلىسىنىڭ اكىمدىگى مالعا قاجەتتى قۇدىق قازۋعا قوسىمشا سۋبسيديا ءبولۋ مۇمكىندىگىن قاراستىرۋدا

1748

ماڭعىستاۋ وبلىسىنىڭ اكىمى نۇرلان نوعاەۆتىڭ توراعالىعىمەن وڭىردەگى اۋىل شارۋاشىلىعى سالاسىنداعى وزەكتى ماسەلەلەر تالقىلانعان  جيىن ءوتتى، دەپ حابارلايدى "ادىرنا" ۇلتتىق پورتالى ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.

جيىنعا اۋىل شارۋاشىلىعى سالاسىنىڭ ماماندارى، ارداگەرلەرى، شارۋا قوجالىقتارىنىڭ يەلەرى مەن جەرگىلىكتى اتقارۋشى ورگانداردىڭ وكىلدەرى قاتىستى. ءتورت ساعاتقا سوزىلعان باسقوسۋدا مال يەلەرى مەن مەملەكەتتىك ورگان وكىلدەرى سىندارلى سۇحبات قۇرىپ، پىكىر الماستى.

كەزدەسۋدە جەم-ءشوپ دايىنداۋ، مال جايىلىمىنا جەر بەرۋ، قۇدىق قازۋ سىندى بىرقاتار ماسەلەلەر قارالدى. ايماق باسشىسى بەلسەندىلىك تانىتقان ازاماتتارعا العىسىن ايتىپ، جاۋاپتى تۇلعالارعا اۋىل شارۋاشىلىعى سالاسىن جاقسارتۋعا ارنالعان ءار ازاماتتىڭ ۇسىنىسىن زەردەلەۋدى تاپسىردى.

جيىندا سونداي-اق قازىرگى تاڭدا ماڭعىستاۋ وبلىسىنىڭ اكىمدىگى مال سۋارۋعا قاجەتتى قۇدىق قازۋعا ارنالعان سۋبسيديانىڭ كولەمىن ۇلعايتۋ مۇمكىندىكتەرىن قاراستىرىپ جاتقانى ايتىلدى.

-ءتورت تۇلىك ءۇشىن سۋدىڭ اسا ماڭىزدى تىرشىلىك كوزى ەكەنىن بارلىعىمىز بىلەمىز. مەملەكەت باسشىسى ماڭعىستاۋ وبلىسىنا كەلگەن ساپارىندا ۇكىمەتكە قۇدىق قازۋعا بەرىلەتىن سۋبسيديا كولەمىن 50-دەن 80 پروتسەنتكە دەيىن ارتتىرۋدى تاپسىردى. بۇدان بولەك، قازىر ءبىز قۇدىق قازۋعا جۇمسالاتىن شىعىنداردىڭ تاعى 10% جەرگىلىكتى بيۋدجەتتەن سۋبسيديالاۋدى قاراستىرىپ جاتىرمىز. ناتيجەسىندە سۋبسيديانى 90% - عا دەيىن ۇلعايتقىمىز كەلەدى. ماسەلە مۇقيات زەردەلەنىپ، وڭ شەشىمىن تاپسا، وبلىستىق ماسليحاتقا ۇسىناتىن بولامىز، - دەدى ءوڭىر باسشىسى.

-بيىلعى قۋاڭشىلىق وبلىستاعى بارلىق مال يەسىنىڭ باسىنا تۇسكەن ورتاق قيىنشىلىق، ورتاق سىناق بولدى. ءبىز بۇل تىعىرىقتان بىرلەسكەن جۇيەلى جۇمىستىڭ ارقاسىندا عانا شىعا الامىز. سالا ارداگەرلەرىنىڭ تاجىريبەلەرى مەن كەڭەستەرى وتە ماڭىزدى، ونى مىندەتتى تۇردە پايدالانامىز. سونداي-اق مال شارۋاشىلىعىمەن اينالىسقىسى كەلەتىن ءار شارۋا ءوز مۇمكىندىگىن ەسكەرگەنى دۇرىس. تابيعي جانە كليماتتىق جاعدايلار بار، جەم-ءشوپ بازاسى بولۋ كەرەك، مالدى باعۋ قاجەت دەگەندەي. مەملەكەتتىك ورگاندار زاڭ شەڭبەرىندە بارىنشا كومەكتەسەدى، بىراق ءاربىر ازاماتتىڭ مالى ءۇشىن جاۋاپ بەرمەيدى. اۋىل شارۋاشىلىعىن ناتيجەلى جۇرگىزۋ ءۇشىن جۇيەلى جۇمىس ىستەۋ كەرەك،- دەدى وبلىس اكىمى.

ءسوز سوڭىندا، نۇرلان نوعاەۆ سونداي-اق جينالعانداردى اۋىل شارۋاشىلىعىن دامىتۋ مەن مال باعۋدا ءتيىمدى تاسىلدەردى قولدانۋعا شاقىردى.

"ادىرنا" ۇلتتىق پورتالى

پىكىرلەر
ۇقساس جاڭالىقتار