قاراعاندى وبلىسى، اقتوعاي اۋدانى شابانباي بي اۋىلىنىڭ تۇرعىندارى الاش قوزعالىسىنىڭ جەتەكشىسى اليحان بوكەيحانعا ءمۇسىن ورناتتى دەپ حابارلايدى "ادىرنا" ۇلتتىق پورتالى "azattyq.org-كە" سىلتەمە جاساپ.
ءاليحان بوكەيحاننىڭ تۋعانىنا 155 جىل تولۋ قۇرمەتىنە ارنالعان ەسكەرتكىشتى شابانباي بي اۋىلى مەكتەبىن 1990 جىلى بىتىرگەن تۇلەكتەر جيناعان قارجىعا قازاقستان سۋرەتشىلەر وداعىنىڭ مۇشەسى، ءمۇسىنشى بەيبىت مۇستافين جاساعان.
ەسكەرتكىش ءمۇسىننىڭ اشىلۋ راسىمىنە ءاليحان بوكەيحاننىڭ ءومىرى مەن قىزمەتى جايلى كوپ تومدىق زەرتتەۋ جيناق شىعارعان سۇلتانحان اققۇلى، 20-عاسىردىڭ باس كەزىندەگى الاش قوزعالىسىن زەرتتەۋشىلەر تۇرسىن جۇرتباي، جاندوس سماعۇلوۆ، قايىربەك كەمەڭگەر، ساعىمباي جۇماعۇلوۆ باستاعان ءبىر توپ عالىمدار، ءماجىلىس دەپۋتاتى قازىبەك يسا جانە جانە وبلىس اكىمدىگىنىڭ وكىلدەرى، اقتوعاي اۋدانىنىڭ اكىمى مەن اۋىل ادامدارى قاتىستى.
سالتاناتتى اشىلۋ راسىمىنەن كەيىنگى عىلىمي-پراكتيكالىق كونفەرەنتسيادا سۇلتانحان اققۇلى ءاليحان بوكەيحاندى "كەنەسارى قاسىمۇلى ولگەننەن كەيىن جويىلعان قازاق مەملەكەتتىگىن قالپىنا كەلتىرۋشى" دەپ باعالادى. الاشتانۋشى تۇرسىن جۇرتباي "بۇگىنگى قازاقستاننىڭ ساياسي-قوعامدىق ۇستانىمدارى ءاليحان بوكەيحان باستاعان الاش قوزعالىسىنىڭ ۇستانىمدارىنا ساي كەلمەي وتىر" دەپ سانايتىنىن ايتتى.
كونفەرەنتسيادان كەيىن بىرقاتار زەرتتەۋشى ءاليحان بوكەيحاننىڭ اتا-اناسى مەن تۋىستارى جەرلەنگەن تالدىبەيىت قورىمىنا باردى. شابانباي بي اۋىلىنان 30 كم جەردە، جىڭىشكە وزەنىنىڭ جاعاسىندا ورنالاسقان قورىمعا ءاليحاننىڭ اكەسى نۇرمۇحامەد، اتاسى مىرزاتاي، اناسى بەگىماي، باۋىرلارى ءازىحان، ءتاتىحان، سماحان جەرلەنگەن.
سماحان كوزى ءتىرى كەزىندە وسى قورىمعا ءاليحان بوكەيحاننىڭ تاقياسىن جەرلەپ، 7 كوكتاس ورناتقان.
