كورشى وزبەكستان ورتالىق ازيادا ءبىرىنشى بولىپ اەس سالاتىن بولادى. قازاقستاننىڭ تاراز قالاسىنىڭ تۇرعىندارى وزبەكستاندا ءبىرىنشى اتوم ەلەكتر ستانساسىنىڭ قۇرىلىسى جوسپارلانىپ وتىرعانىنا الاڭداۋشىلىق ءبىلدىردى، دەپ حابارلايدى "ادىرنا" ۇلتتىق پورتالى "Atameken Business News-كە" سىلتەمە جاساپ.
جەرگىلىكتى تۇرعىندار وزبەكساننىڭ بۇل يدەياسىنا قارسى، ولار بۇل جوبانى كورشى مەملەكەتتەرمەن بىرلەسە وتىرىپ سالۋ كەرەك دەپ سانايدى.
باسىلىم سونىمەن قاتار جەرگىلىكتى تۇرعىنداردىڭ الەۋمەتتىك ساۋالناماسىن جاريالادى. وندا قازاقستاندىقتار چەرنوبىل اپاتىن ەسكە الىپ، بالالارىنىڭ دەنساۋلىعى ءۇشىن قورقاتىنىن ايتقان.
بۇعان قوسا، قازاقستاننىڭ ەكولوگتارى جوباعا شاعىمدانىپ جاتىر. ولاردىڭ پىكىرىنشە، وزبەكستان اەس-تەن الىناتىن ەنەرگيانىڭ قۇنىن عانا ەسكەرىپ وتىر، بىراق قورشاعان ورتاعا قاتىستى پروبلەمالاردى ەسكەرمەگەن.
"بۇدان بىزگە تەك زيان كەلەدى. باسقا قانداي پايدا بار؟"- دەيدى تاراز قالاسىنىڭ تۇرعىندارى.
"ادىرنا" ۇلتتىق پورتالى
