قوستاناي وبلىسىنداعى «دون مار» زاۋىتىنىڭ ءونىمى شارۋالاردىڭ تالابى مەن ۇدەسىنەن شىعىپ كەلەدى. كاسىپورىن سوڭعى جىلدارى اۋىل شارۋاشىلىعىنا قاجەتتى قۇرال-جابدىقتاردىڭ ءوندىرىسىن ەكى ەسە ارتتىردى. وتاندىق كومباين دەستەلەگىشتەرى قازاقستاندا عانا ەمەس، رەسەيدە دە زور سۇرانىسقا يە.
ليساكوۆ قالاسىنىڭ ءونىمى كورشى ەلدىڭ بىرنەشە ايماعىنا جىبەرىلەدى. مەتالل كەسۋشى ەربولات مىرزاقاەۆتىڭ «دون مار» كومپانياسىنا كەلگەنىنە بيىل ون جىل تولدى. شەبەر تسەحتاعى بارلىق قۇرىلعىنى بەس ساۋساعىنداي بىلەدى. مەتالل قيۋ ستانوگىندا ءبىر اۋىسىمدا 80-گە جۋىق بولشەك شىعارادى.
ەربولات مۇرزاقاەۆ، مەتالل كەسۋشى:
– وندىرىستە جۇمىستىڭ وڭاي ءتۇرى بولمايدى. تەمىر كوتەرىپ شارشايسىڭ. بىراق جالاقىسى لايىق. ۇجىمىمىز وتە ەڭبەكقور. وسى ون جىل ىشىندە بىلگەن-تۇيگەنىمدى جاستارعا ۇيرەتۋدەن جالىقپادىم. تولىق تسيكلدى كومباين دەستەلەگىشىنە قاجەتتى كەيبىر ۇساق بولشەكتەر سىرتتان الىنسا، قالعان بولىگى وسى زاۋىتتا جاسالادى. قازىر ءبىر اگرەگاتتىڭ وتاندىق ۇلەسى 65 پروتسەنتكە جەتكەن. ءوندىرىس ورنىندا 180 ادام ەڭبەك ەتەدى. جۇمىس توقتاۋسىز بەس ۋچاسكەدە وتەدى.
سەرگەي بوپپ، تسەح باستىعى:
–كۇنىنە ءتورت دەستەلەگىش شىعارامىز. ەنى 16 مەترگە دەيىن جەتەدى. وعان قوسا تىركەمە دە بولادى. نيۋ حوللاند، دجون دير سياقتى كومبايندارعا دا دەستەلەگىشتەردى ارنايى تاپسىرىسپەن جاساي الامىز.
«دون مار» زاۋىتى 20 جىلدان استام بۇرىن قۇرىلدى. شىعارىلاتىن ءونىمى زاماناۋي. باعاسى دا قولجەتىمدى. كاسىپورىن ىسكە قوسىلعالى بەس مىڭنان ارتىق كومباين وراعى قۇراستىرىلدى. جارامدىلىق مەرزىمى ۇزاق، ساپاسى جوعارى بولعاندىقتان العاشقى جاسالعان دەستەلەگىشتەردىڭ كەيبىرى ءالى كۇنگە دەيىن القاپتاردا پايدالانىلادى.
يۋليا ستريگينا، «دون مار» جشس ديرەكتورى:
ء–بىزدىڭ ءونىمدى ەلىمىزدىڭ بارلىق ايماقتارى تۇتىنادى. رەسەيلىكتەر تاراپىنان دا قىزىعۋشىلىق جوعارى. سونىڭ ىشىندە ساراتوۆ، سامارا، ورىنبور، بارناۋل، ومبى قالالارىنان كوپتەپ تاپسىرىس تۇسەدى. قىركۇيەك ايىندا ەلوردادا ماشينا جاساۋشىلار وداعىنىڭ كەزەكتى فورۋمى وتەدى. جيىنعا «دون مار» كومپانياسىنىڭ وكىلدەرى دە شاقىرتۋ العان. وندا سالا وكىلدەرى ءوزارا تاجىريبە الماسىپ، الداعى جۇمىس جوسپارىن بەلگىلەيدى.
اۆتورلارى: دانيار سۇلتانۇلى، ەرمەك مۇحامەدياروۆ
