قالالىق بالالار شىعارماشىلىق مەكتەبىندە ەل تاۋەلسىزدىگىنىڭ 30 جىلدىق مەرەيتويىنا وراي، ەدىگە باتىر جىرىن جاتقا ايتۋ بويىنشا 6-10 سىنىپ وقۋشىلارى اراسىندا وبلىستىق ءبىلىم باسقارماسىنىڭ ۇيىمداستىرۋىمەن «تۇلپار ءمىنىپ، تۋ العان» وبلىستىق بايقاۋى ءوتتى.
بۇل بايقاۋعا ۇزدىكتەردىڭ ۇزدىگى اۋداندىق جانە قالالىق كەزەڭدەردىڭ جەڭىمپازدارى قاتىستى. سونىمەن قاتار تالاپتى وقۋشىلاردىڭ دوداسىندا قالالىق شىعارماشىلىق مەكتەبىنىڭ «ينديگو» بي توبى ونەر كورسەتتى.
ءبىلىمدى جاستاردىڭ ونەرىن قۇرامىنا اقىن، حالىقارالىق «الاش» ادەبي سىيلىعىنىڭ لاۋرەاتى، «التىن قالام» سىيلىعىنىڭ يەگەرى اقىلبەك شاياحمەت، ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ پروفەسسورى، اقىن سەرىكباي وسپانوۆ، ا.بايتۇرسىنوۆ اتىنداعى وڭىرلىك ۋنيۆەرسيتەتىنىڭ «ءتىل جانە ادەبيەت تەورياسى» كافەدراسىنىڭ مەڭگەرۋشىسى قارلىعاش نۇرمۇحامەدوۆا، اكتەر، ءى.وماروۆ اتىنداعى وبلىستىق قازاق دراما تەاترىنىڭ ديرەكتورى ءالىمحان مىرزاحان كىرگەن ءادىل قازىلار القاسى سەمينارعا قاتىسىپ، جەڭىمپاز اتانامىن دەپ كەلگەن ءار اۋداننىڭ، ءار قالانىڭ نامىسىن قورعاعان ءبىلىمدى شاكىرتتەرگە ءتيسىلى باعاسىن قويدى.
ءادىل قازىلاردىڭ شەشىمىمەن وبلىستىق «تۇلپار ءمىنىپ، تۋ العان» بايقاۋىنىڭ باس جۇلدەسىن رۋدنىي قالاسىنىڭ وقۋشىسى نۇرسيلا ابەدوۆا جەڭىپ الىپ، 600 مىڭ تەڭگە سىياقىعا يە بولدى. ال جەڭىمپازدى دايىنداعان ۇستاز قىمبات بيرمانوۆاعا 500 تەڭگە سىياقى ۇسىنىلدى. 1-ءشى ورىندى يەلەنگەن قارابالىق اۋدانىنىڭ وقۋشىسى التىناي ومىرزاقوۆاعا 500 تەڭگە تابىس ەتىلدى. ونى دايىنداعان جەتەكشىسى المابيكە ەسكەندىروۆاعا 450 مىڭ تەڭگە كولەمىندە جۇلدە بۇيىردى. ال 2 ورىن العان قوستاناي اۋدانىنىڭ وقۋشىسى شاپاعات قۇرمانعازىقىزى 350 مىڭ تەڭگەگە يە بولدى. ونىڭ ۇستازى تولقىن ايماعانبەتوۆاعا 300 مىڭ تەڭگە تابىس ەتىلدى. 3 ورىندى قانجىعاسىنا بايلاعان جاندوس قاساەۆ 250 مىڭ تەڭگەنىڭ يەگەرى اتاندى. ۇستازى جاندوس پانيازعا 200 مىڭ تەڭگە بەرىلدى.
مىنە، وسىلايشا وبلىستىق بايقاۋدىڭ جەڭىمپازدارى ءتيىستى دارەجەدە ماراپاتتالدى. ءبىلىم دوداسىنا قاتىسقان باسقا دا وقۋشىلار سەرتيفيكات پەن 20 مىڭ تەڭگە كولەمىندە اقشالاي سىيلىقتىڭ يەگەرى اتاندى.
-بايقاۋعا وقۋشىلار جوعارى دايىندىقپەن كەلگەنىن بايقادىق. وسىنداي دودانىڭ ۇيىمداستىرىلاتىنىن بىلگەننەن باستاپ، ۇستازدارىمەن كۇندەلىكتى دايىندىق جۇمىستارىن جۇرگىزگەن. بۇل وڭاي ەمەس. سوندىقتان بۇگىن بايقاۋعا قاتىسىپ، بىلىمدەرىنىڭ تەرەڭدىگىن تانىتقان وقۋشىلارعا العىسىمىزدى بىلدىرەمىز. سونداي-اق وسىنداي بىلىكتى شاكىرتتەر دايىنداپ جۇرگەن ۇستازدار قاۋىمىنا دە ۇلكەن راحمەت. ءاردايىم وقۋشىلارى بيىكتەردەن كورىنە بەرسىن،-دەيدى وبلىستىق ءبىلىم باسقارماسىنىڭ باس مامانى قالامقاس قاراتاەۆا.
«بىلەكتى ءبىردى جىعار، ءبىلىمدى مىڭدى جىعار» دەپ بەكەر ايتالماسا كەرەك. قازىرگى ءبىلىمنىڭ ورنى ەرەكشەلەنىپ تۇرعان كەزدە بىلىكتى دە ءبىلىمدى شاكىرتتەرىمىزدىڭ سانى ارتا تۇسسە، نۇر ۇستىنە نۇر بولار ەدى.
اياگوز كاكىمجانوۆا
