اتىراۋدا ستاتسيونارداعى كوروناۆيرۋس ناۋقاستارىنىڭ سانى 4 ەسە ازايدى

1738
Adyrna.kz Telegram

بۇل تۋرالى ايماق باسشىسى ماحامبەت دوسمۇحامبەتوۆتىڭ توراعالىعىمەن وتكەن وتىرىستا وبلىستىق دەنساۋلىق باسقارماسىنىڭ باسشىسى مالىمدەدى.

جيىندا وبلىستىق دەنساۋلىق باسقارماسىنىڭ باسشىسى اسحان بايدۋاليەۆ وڭىردەگى ەپيدەميالىق جاعدايدى باياندادى.
«قازىرگى تاڭدا ينفەكتسيالىق ستاتسيوناردا 433 ناۋقاس ەمدەلۋدە. توسەك-ورىن جۇكتەمەسى 18,4 %-دى قۇرايدى. ال، وسىدان ءبىر اي بۇرىن 1776 ناۋقاس ينفەكتسيالىق ستاتسيوناردا جاتقان بولاتىن. بۇگىنگى كۇنمەن سالىستىرساق ناۋقاستار سانى 4,1 ەسەگە تومەندەپ وتىر. سونداي-اق، سوڭعى ءبىر ايدى سالاستىراتىن بولساق امبۋلاتوريالىق ەم قابىلداپ جاتقان ناۋقاستار سانى 8693-تەن 1534-گە تومەندەگەن، ياعني 5,6 ەسەنى قۇرايدى»،-دەدى ول.

سونىمەن قاتار، باسقارماسى باسشىسى وبلىستاعى ۆاكتسيناتسيالاۋ جۇمىستارىنا دا توقتالىپ ءوتتى. ا.بايدۋاليەۆتىڭ ايتۋىنشا، بۇگىنگى كۇنگە دەيىن وڭىرگە 248 330 دوزا I كومپونەنت جانە 211 330 II كومپونەنت ۆاكتسينا جەتكىزىلسە، تۇرعىنداردىڭ 72,5%-ى ەكپە الىپ ۇلگەرگەن.

دەسە دە باسقارما باسشىسى سوڭعى ۋاقىتتا ەكپە جۇمىستارى باسەڭدەگەن اۋدانداردى دا اتاپ ءوتتى. ايتالىق، وبلىس بويىنشا ەكپەمەن قامتۋدىڭ ەڭ جوعارعى كورسەتكىشى اتىراۋ قالاسىندا 80,0% جانە قۇرمانعازى اۋدانىندا 65,0% بولسا، ال كەرىسىنشە ەڭ تومەنگى كورسەتكىش ماحامبەت 52,7% جانە جىلىوي اۋدانىندا 36,2% قۇراپ وتىر.

وبلىس اكىمى ماحامبەت دوسمۇحامبەتوۆ اۋدان اكىمدەرىنە ەكپە جۇمىستارىن كۇشەيتۋ قاجەتتىگىن باسا تاپسىردى.
«ەلدەگى ۆاكتسيناتسيالاۋ جۇمىستارىنىڭ وڭ ناتيجەلەرىن كورسەتە وتىرىپ، بۇقارالىق اقپارات قۇرالدارىندا، الەۋمەتتىك جەلىلەردە ناسيحاتتاۋ جۇمىستارىن جالعاستىرىپ، ۆاكتسينا الۋعا قارسى كورسەتىلىمى جوق ازاماتتاردىڭ تولىق ەكپەدەن ءوتۋىن قامتاماسىز ەتۋ كەرەك»،-دەدى م.دوسمۇحامبەتوۆ.

ايتا كەتەيىك، وبلىستا ىندەت باستالعالى 49 762 ادامنان COVID-19 كوروناۆيرۋس ينفەكتسياسى انىقتالىپ، وسى ارالىقتا سىرقاتتانعان ناۋقاستاردىڭ 94%-ى ساۋىعىپ شىققان.

پىكىرلەر