قازاقستاندىق عالىمدار التسگەيمەر جانە پاركينسون اۋرۋلارىنا قارسى ءدارى جاساپ جاتىر، دەپ حابارلايدى «ادىرنا» ءتىلشىسى بعم ءباسپاسوز قىزمەتىنە سىلتەمە جاساپ.
قورقىت اتا اتىنداعى قىزىلوردا ۋنيۆەرسيتەتىنىڭ عالىمدارى ەۋروپالىق وداق گرانتىن جەڭىپ الدى. ولار پورتۋگاليا، نيدەرلاندى، دانيا، رەسەي، بەلارۋس جانە ۋكراينا عالىمدارىمەن بىرلەسىپ، ازىرلەۋشىلەر توبىنا كىردى.
دارىلىك پرەپاراتتى دايىنداۋ ءۇشىن قازاقستاننىڭ وڭتۇستىك ايماقتارىندا وسەتىن تۇيە تىكەنەگى پايدالانىلادى.
وتاندىق زەرتتەۋشىلەر وسىمدىكتەن اتەروسكلەروزدىڭ باستاپقى فورمالارىن ەمدەۋدە ءتيىمدى بيولوگيالىق بەلسەندى زاتتاردى الدى.
«ءبىز دارىلىك وسىمدىك – تۇيە تىكەنەگىنە زەرتتەۋ جۇرگىزۋ ءۇشىن ءبىلىم جانە عىلىم مينيسترلىگى عىلىم كوميتەتىنىڭ گرانتىن الدىق. سودان كەيىن ءبىز ونىڭ قۇندى قاسيەتتەرىن انىقتادىق. ءبىز ءوزىمىز اشقان جاڭالىقتى پورتۋگاليادا تانىستىردىق. ولار ءبىزدىڭ عىلىمي ازىرلەمەلەرىمىزگە قىزىعۋشىلىق تانىتىپ، ىنتىماقتاستىق ۇسىندى. جوبانى ورىنداۋ كەزىندە فلاۆونويدتاردىڭ سۋدا ەريتىن فورمالارىن الامىز، ولاردى كومىرتەكتى نانوماتەريالدارمەن موديفيكاتسيالايمىز. شەتەلدىك عالىمدار جەدەل تەست وتكىزىپ، ءبىز انىقتاعان نانوماتەريالدار التسگەيمەر جانە پاركينسون اۋرۋلارىنىڭ دامۋىنا كەدەرگى كەلتىرەتىنىن جانە پاتسيەنتتەردى اۋرۋدىڭ العاشقى كەزەڭدەرىندە ەمدەۋگە كومەكتەسەتىنىن راستادى. سونىمەن قاتار تۇيە تىكەنەگىنەن الىنعان موديفيكاتسيالانعان بيولوگيالىق بەلسەندى زاتتاردىڭ جاناما اسەرلەرى جوق جانە ادام دەنساۋلىعى ءۇشىن قاۋىپسىز بولىپ تانىلدى»، – دەدى قورقىت اتا اتىنداعى قىزىلوردا ۋنيۆەرسيتەتىنىڭ زەرتتەۋشى-پروفەسسورى نۇربول اپپازوۆ.
قىزىلوردالىق عالىمدار شەتەلدىك ارىپتەستەرىمەن بىرگە بايقاۋعا قاتىسۋ ءۇشىن ءوتىنىش بەرىپ، Horizon-2020 باعدارلاماسى بويىنشا ەۋروپالىق وداقتىڭ گرانتىن جەڭىپ الدى. ەندى عىلىمي توپ كلينيكاعا دەيىنگى جانە كلينيكالىق زەرتتەۋلەر جۇرگىزۋدى جوسپارلاپ وتىر.
قورقىت اتا اتىنداعى قىزىلوردا ۋنيۆەرسيتەتىنىڭ عالىمدارىندا باسقا دا كوپتەگەن يننوۆاتسيالىق جوبالار بار، ولاردىڭ ءبىر بولىگى كوممەرتسيالاندىرىلعان. ماسەلەن، حيميك عالىم، پروفەسسور نۇربول اپپازوۆ قارا التىندى مۇناي شلامىنان وڭدەۋدىڭ ءتيىمدى ءادىسىن ويلاپ تاپتى. جوبا قۇمكولدىڭ ءىرى مۇناي-گاز كەن ورىندارىنىڭ بىرىندە ەنگىزىلدى. قازاقستاندىق عالىمنىڭ جوباسى كوپتەگەن شەتەلدىك جوبالار اراسىنان توپ جارىپ، ەڭ ۇنەمدى جوبالاردىڭ ءبىرى رەتىندە تانىلدى.
عالىمداردىڭ كۇرىش سابانىنان تسەلليۋلوزا الۋ جوباسى قاعاز وندىرىسىندە قولدانىسقا ەنگىزىلدى. بۇرىن استىق جيناپ، وڭدەگەننەن كەيىن مىڭداعان توننا كۇرىش سابانى مەن قاۋىزى قولدانىلماي ورتەلەتىن. عالىمداردىڭ جۇمىسىنىڭ ارقاسىندا ەكولوگياعا تازا شەشىم تابىلدى. قازىر كۇرىش سابانىنىڭ داندەرى مەن قابىعىنان قاعاز، بەلسەندىرىلگەن كومىر جانە تىڭايتقىش - بيوچار جاسالادى.
سوڭعى ءۇش جىلدا قىزىلوردالىق عالىمدار 60 بىرەگەي عىلىمي ازىرلەمەنى پاتەنتتەدى. 10-نان استام يننوۆاتسيالىق جوبانى كوممەرتسيالاندىرۋ جوسپاردا بار.
«ادىرنا» ۇلتتىق پورتالى
