قر اقپارات جانە قوعامدىق دامۋ ءمينيسترى ايدا بالاەۆا الماتىدا «قورقىت اتا» تەلەحيكاياسى شىعارماشىلىق توبىنىڭ مۇشەلەرىمەن كەزدەستى دەپ حابارلايدى "ادىرنا" ۇلتتىق پورتالى.
ەسكە سالا كەتەيىك، تەلەحيكايانى ازىرلەۋ جۇمىستارىن باستاۋعا كەلىسىمدەرگە وسى جىلدىڭ ءساۋىر ايىندا وتكەن تۇركياعا رەسمي ساپار كەزىندە قول جەتكىزىلگەن بولاتىن.
مينيستر ا.بالاەۆا تەلەحيكايانىڭ شىعاراشىلىق توبىمەن كەزدەسۋدە:
"قورقىت اتا – تۇركى الەمىنىڭ ەڭ ۇلى تۇلعالارىنىڭ ءبىرى، بارلىق تۇركى حالقىنا ورتاق تۇلعا، ورتاق مۇرا. سوندىقتان بۇل تۋىندى تەك ءبىزدىڭ كورەرمەندەرگە عانا ەمەس، باسقا دا ەلدەردە ۇلكەن سۇرانىس اكەلەدى دەپ سەنەمىن. تۇركيا، ءازىربايجان، وزبەكستان ەلدەرىن وسى جوباعا شاقىرىپ، ارىپتەستىك ورناتۋ جونىندە ۇسىنىس جاسادىق. قازىر ءتيىستى كەلىسسوزدەر ءجۇرىپ جاتىر", - دەدى.
الماتىدا وتكەن وتىرىسقا "Qazaqstan" تەلەراديوكورپوراتسياسىنىڭ باسقارما ءتورايىمى لياززات تانىسباي، ەتنوگراف-عالىم، ونەرتانۋشى تىنىسبەك قوڭىراتباەۆ، كينوسىنشى دارەجان ومىرباەۆ، ادەبيەتتانۋشى ءاليا بوپەجانوۆا، ت.جۇرگەنوۆ اتىنداعى قازۇوا پروفەسسورى، كينوتانۋشى گۇلجان ناۋرىزبەكوۆا، تمد جۋرناليستەر كونفەدەراتسياسى سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، تەلەراديوكورپوراتسيا ارداگەرى قاينار ولجاي، ونەرتانۋشى ساعاتبەك قاليەۆ، ستسەناريست بەكزات مىرزاحمەت قاتىستى.
ءتورت ءبولىمدى «قورقىت اتا» تەلەحيكاياسىنىڭ ستسەناريى بيىل جازىلادى دەپ جوسپارلانۋدا.
"ادىرنا" ۇلتتىق پورتالى.
