«كونە عاسىر كۇمبىرى» اتتى جىرشى-تەرمەشىلەر بايقاۋى ءوتتى

5066
Adyrna.kz Telegram

ەلىمىزدىڭ مادەني الەمىندە، نەبىر داۋلەسكەر كۇيشىلەر، باتىرلار جىرىن جاتقا ايتاتىن ءدۇلدۇل جىراۋلار مەن بۇلبۇل انشىلەر تەرمەشىلەر وتكەن. شوقتىعى بيىك وسى جىرشى-جىراۋلىق ونەر ارقىلى، حالقىمىزدىڭ اۋىز ادەبيەتى، مادەنيەتى، جىرشىلىق ونەرى دامىپ، نەبىر تالانت يەلەرى تورتكۇل دۇنيەگە تانىلۋدا. كەيىنگى بولاشاق ۇرپاقتى ۇلى تۇلعا، فيلوسوف، فولكلورشى، ەتنوگراف ءماشھۇر بابامىزدىڭ شىعارمالارى ارقىلى تاربيەلەۋ ۇلكەن ۇلگى بولىپ كەلەدى. ەلىنىڭ تاۋەلسىزدىگىن اڭساپ كەتكەن بابامىز بولاشاق ۇرپاققا قانشاما قۇندى ەڭبەكتەرى مەن شىعارمالارىن  ۇمىتىلماس مۇرا قىلىپ تاستاپ كەتتى. قازىرگى تاڭدا بابامىزدىڭ شىعارمالارىن ۇلكەن دە كىشى دە قارا سوزبەن، تەرمە جىرلارمەن شىرقاپ، حالقىنا جەتكىزۋدە. بۇل ءبىزدىڭ تاۋەلسىزدىگىمىزدىڭ ايعاعى.

بابامىزدىڭ شىعارماشىلىعىنىڭ ءتالىم الار تۇستارى بارشىلىق،  فيلوسوفيالىق  تۋىندىلارى دا زامان اعىمىنا قاراي قۇندىلىعىن جوعالتپايتىن، ساپالىلىعىمەن ەرەكشەلەنەدى.

بيىلعى جىلى قازاقستان رەسپۋبليكاسى تاۋەلسىزدىگىنە 30 جىل تولۋىنا وراي  پاۆلودار وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن ءداستۇرلى تۇردە ءماشھۇر ءجۇسىپ كوپەيۇلى اتىنداعى «كونە عاسىر كۇمبىرى» اتتى ايماقتىق جىرشى، تەرمەشىلەر بايقاۋى 6-شى رەت شىمىلدىعىن ءتۇردى. اتالمىش ايماقتىق بايقاۋعا قاراعاندى، كوكشەتاۋ، شىعىس-قازاقستان وبلىستارى مەن نۇر-سۇلتان قالاسىنان جانە پاۆلودار وبلىسىنىڭ اۋداندارى اتىنان 15-69 جاس ارالىعىندا 19 ونەرپاز قاتىسىپ، ءماشھۇر بابامىزدىڭ ءىنجۋ مارجاندارىمەن قوسا حالىق اۋىز ادەبيەتىنەن اۋىزدانعان جىر-داستان، تەرمەلەردى ورىنداپ، كورەرمەندەردىڭ ىستىق ىقىلاسىنا بولەندى. قازىلار القاسىنىڭ شەشىمى بويىنشا باس جۇلدەگە پاۆلودارلىق تەرمەشى، ءانشى سالتانات قيساتوۆا لايىق دەپ تانىلدى.

«ادىرنا» ۇلتتىق پورتالى

پىكىرلەر