Elimizdiń mádenı áleminde, nebir dáýlesker kúıshiler, batyrlar jyryn jatqa aıtatyn dúldúl jyraýlar men bulbul ánshiler termeshiler ótken. Shoqtyǵy bıik osy jyrshy-jyraýlyq óner arqyly, halqymyzdyń aýyz ádebıeti, mádenıeti, jyrshylyq óneri damyp, nebir talant ıeleri tórtkúl dúnıege tanylýda. Keıingi bolashaq urpaqty uly tulǵa, fılosof, folklorshy, etnograf Máshhúr babamyzdyń shyǵarmalary arqyly tárbıeleý úlken úlgi bolyp keledi. Eliniń Táýelsizdigin ańsap ketken babamyz bolashaq urpaqqa qanshama qundy eńbekteri men shyǵarmalaryn umytylmas mura qylyp tastap ketti. Qazirgi tańda babamyzdyń shyǵarmalaryn úlken de kishi de qara sózben, terme jyrlarmen shyrqap, halqyna jetkizýde. Bul bizdiń Táýelsizdigimizdiń aıǵaǵy.
Babamyzdyń shyǵarmashylyǵynyń tálim alar tustary barshylyq, fılosofııalyq týyndylary da zaman aǵymyna qaraı qundylyǵyn joǵaltpaıtyn, sapalylyǵymen erekshelenedi.
Bıylǵy jyly Qazaqstan Respýblıkasy Táýelsizdigine 30 jyl tolýyna oraı Pavlodar oblysynyń mádenıet, tilderdi damytý jáne arhıv isi basqarmasynyń qoldaýymen dástúrli túrde Máshhúr Júsip Kópeıuly atyndaǵy «Kóne ǵasyr kúmbiri» atty aımaqtyq jyrshy, termeshiler baıqaýy 6-shy ret shymyldyǵyn túrdi. Atalmysh aımaqtyq baıqaýǵa Qaraǵandy, Kókshetaý, Shyǵys-Qazaqstan oblystary men Nur-Sultan qalasynan jáne Pavlodar oblysynyń aýdandary atynan 15-69 jas aralyǵynda 19 ónerpaz qatysyp, Máshhúr babamyzdyń injý marjandarymen qosa halyq aýyz ádebıetinen aýyzdanǵan jyr-dastan, termelerdi oryndap, kórermenderdiń ystyq yqylasyna bólendi. Qazylar alqasynyń sheshimi boıynsha Bas júldege Pavlodarlyq termeshi, ánshi Saltanat Qısatova laıyq dep tanyldy.
«Adyrna» ulttyq portaly
