تانىمال ارحەولوگ اندرەي استافەۆ وسىدان 200 جىلدان استام ۋاقىت بۇرىن كاسپي تەڭىزىندە جۇرگەن كەمەنىڭ بەكىتكىش بۇراندالارى مەن شەگەلەرىن تاۋىپ الدى. بۇل تۋرالى ماڭعىستاۋ وبلىسى اكىمىنىڭ ءباسپاسوز قىزمەتى مالىمدەدى دەپ حابارلايدى "ادىرنا" ۇلتتىق پورتالى.
تاريحي جادىگەر تۇپقاراعان اۋدانىنا قاراستى «تۇلكىلى ساي» جەرىندەگى تەڭىز جاعالاۋىندا كومىلىپ جاتقان.
ارحەولوگتىڭ زەردەلەۋىنشە، كەمە حVIII عاسىردىڭ اياعىندا كاسپي تەڭىزىندە ءجۇزىپ جۇرگەن جەرىنەن اپاتقا ۇشىراعان. سۋ قۇرالىنىڭ اعاش شانتاعىن سۋ شايىپ كەتكەنىمەن، تەمىر بۇيىمدار تەڭىز تۇبىندە شوگىپ قالا بەرگەن. جىلدار وتە، تەڭىز دەڭگەيىنىڭ وزگەرۋىمەن قۇرلىققا شىعىپ، ارحەولوگ قازىپ العانشا بوي كورسەتپەگەن.
اندرەي استافەۆ بۇل ولجاسىن ءابىش كەكىلبايۇلى اتىنداعى ماڭعىستاۋ وبلىستىق تاريحي-ولكەتانۋ مۋزەيىنىڭ قورىنا وتكىزدى.
ارحەولوگتىڭ مۋزەيتە تابىستاعان سىيلىعى بۇل عانا ەمەس. قاراقاباق قالاشىعىنا ارحەولوگيالىق قازبا جۇمىستارىن جۇرگىزۋ كەزىندە ۇڭگىرگە تاپ بولىپ، ونىڭ ىشىنەن كەندىر ارقان مەن ارقانعا بايلانعان ىلمەكتەر تاپقان.
كەمەگە قاتىستى زاتتار ەكەنى كورىنىپ تۇر. كەمى ءبىر عاسىر بۇرىن ازىرلەنسە دە، قۇرعاق جەردە جاتقاندىقتان، جاقسى ساقتالعان.
"ادىرنا" ۇلتتىق پورتالى.
