تاليبان راديكالدى قوزعالىسىنىڭ وكىلدەرى باتىستى "ادام ەمەستەردىڭ قوعامى" دەپ ايىپتادى. تاليبان قوزعالىسىنىڭ جەتەكشىلەرىنىڭ ءبىرى زابيۋللا مۋدجاحيد بۇگىن باتىس الەمى جايىندا وسىنداي توسىن مالىمدەمە جاسادى.
زابيۋللا مۋدجاحيد ءوز سوزىندە:
"باتىس ءبىزدىڭ ىسىمىزگە ارالاسپاسىن! ولار ءبىزدىڭ بارلىق رەسۋرسىمىزدان ايىرىپ جاتىر. ءبىزدىڭ عالىمداردى، ۇستازداردى، دارىگەرلەردىڭ ءبارىن وزدەرىنە تارتىپ الدى. ولار امەريكاعا بارىپ، ەدەن جۋادى، ىدىس-اياق جۋادى. بۇل ادامگەرشىلىككە جاتپايدى",-دەدى.
تاليبان جەتەكشىسى اۋعانستاننان اقش-قا اۋىپ كەتكەن ينتەللەگەنت، ءبىلىمدى ادامدار مەن مامانداردىڭ سوڭىنان ەشقاشان دا قۋدالامايمىز، ولارعا كەلەمىن دەسە ەسىك اشىق ەكەنىن ەسكەرتتى. ولارعا اۋعان جەرىندە بولاشاقتا دا ەشقانداي قاۋىپ بولمايتىنىن اتاپ ءوتتى.
بەلگىلى اراپ جانە يسلام الەمىنىڭ زەرتتەۋشىسى بوريس دولگوۆ ءدال قازىرگى ۋاقىتتا اقش پەن تاليبان اراسىندا ناعىز پروپاگاندالىق سوعىس ءجۇرىپ جاتقانىن ايتتى. عالىم الداعى ۋاقىتتا اۋعانستاننان اۋىپ كەتكەن ادامدار ەلىنە ورالار بولسا، وندا ولاردى ءدىني پرينتسيپتەگى قاتاڭ جازالار كۇتىپ وتىرعانىن دا ايتا كەتتى.
بىراق اۋعانستانعا ءبارىبىر زامانعا ساي ماماندار كەرەك ەكەنىن تاليبان راديكالدى قوزعالىسىنىڭ وكىلدەرى دە جاقسى بىلەدى.
بەكبولات قارجان،
"ادىرنا" ۇلتتىق پورتالى
