اقش پرەزيدەنتى بۇۇ باس اسسامبلەياسىنىڭ سەسسياسىندا حالىقارالىق قىلمىستىق سوتتى (حقس) «باقىلاۋدان شىققان ينستيتۋت» دەپ اتادى، دەپ حابارلايدى "ادىرنا" ۇلتتىق پورتالى.
سونداي-اق، وعان مۇشە مەملەكەتتەردى ۇيىمنان دەرەۋ شىعۋعا ۇندەدى.
22 قىركۇيەكتە نيۋ-يوركتە سويلەگەن سوزىندە ترامپ اقش اسكەري قىزمەتشىلەرىنىڭ «انتيامەريكالىق سوت الدىندا» جاۋاپقا تارتىلۋىنا جول بەرمەيتىنىن مالىمدەدى. ونىڭ ايتۋىنشا، حالىقارالىق قىلمىستىق سوت ءوز وكىلەتتىگىنەن اسىرا پايدالانعان.
«مەن حقس-قا مۇشە بارلىق ەلدى باقىلاۋدان شىققان بۇل ينستيتۋتتاعى مۇشەلىگىن دەرەۋ رەسمي تۇردە توقتاتۋعا شاقىرامىن»، – دەدى اقش پرەزيدەنتى.
ۆاشينگتون بۇعان دەيىن دە حالىقارالىق قىلمىستىق سوت وكىلدەرىنە سانكتسيالار ەنگىزگەن. 18 تامىزدا اقش مەملەكەتتىك حاتشىسى ماركو رۋبيو سوت توراعاسى توموكو اكانە مەن اعا پروكۋرور ابدۋلاي سەيەگە قاتىستى شەكتەۋ شارالارىن جاريالادى.
رۋبيو ولاردىڭ حقس-تىڭ سوت يۋريسديكتسياسىن مويىندامايتىن مەملەكەتتەردىڭ لاۋازىمدى تۇلعالارىن تەرگەۋ جانە قۋدالاۋ ارەكەتتەرىنە قاتىسى بار ەكەنىن مالىمدەدى.
اقش حقس قۇرعان حالىقارالىق كەلىسىمگە قاتىسۋشى ەمەس. ۆاشينگتون سوتتى امەريكالىق اسكەري قىزمەتشىلەر مەن بارلاۋ قىزمەتكەرلەرىنە قاتىستى تەرگەۋدى جالعاستىرىپ، اقش ەگەمەندىگىنە قاۋىپ ءتوندىرىپ وتىر دەپ ايىپتايدى.
بۇۇ مىنبەرىندە ۋكرايناداعى سوعىس تۋرالى دا ءسوز قوزعاعان دونالد ترامپ قاقتىعىستىڭ كوپشىلىك كۇتكەننەن ەرتەرەك اياقتالۋى مۇمكىن ەكەنىن ايتتى. ونىڭ سوزىنشە، اقش رەسەي جانە ۋكراينا باسشىلىعىمەن وسى ماسەلە بويىنشا تىعىز جۇمىس ىستەپ جاتىر. سونىمەن قاتار ترامپ ۆاشينگتوننىڭ ماسكەۋگە قىسىمدى كۇشەيتۋگە دايىن ەكەنىن اڭعارتتى.
