رەجيسسەر فارحات ءشارىپوۆتىڭ "18 كيلوگەرتس" ءفيلمى XVII قازان حالىقارالىق مۇسىلمان كينوفەستيۆالىندە گران-پري جەڭىپ الدى دەپ حابارلايدى "ادىرنا" ۇلتتىق پورتالى.
سونداي -اق فيلم ۇزدىك وپەراتورلىق جۇمىس ءۇشىن بەرىلەتىن ماراپاتقا دا يە بولدى (الەكساندر پلوتنيكوۆ).
"18 كيلوگەرتس" – 90-جىلداردىڭ سوڭىنداعى جاسوسپىرىمدەردىڭ ومىرىنەن سىر شەرتەتىن فيلم. زارا ەسەناماننىڭ "حاردكور" رومانى بويىنشا تۇسىرىلگەن فيلم قازاقستاندا 2021 جىلى اقپاندا شىققان بولاتىن.
"18 كيلوگەرتس – ەرەسەكتەر ەستىمەيتىن دىبىس جيىلىگى. فيلم جاسوسپىرىمدەر پروبلەمالارىنا ارنالعان. ەسەيە كەلە جىل سايىن جاس بۋىننىڭ قيىندىقتارىن ءتۇسىنۋ قيىنداپ بارا جاتىر. ءوزىمىز دە ءجاسوسپىرىم بولدىق، كەي پروبلەمالار شەشىلمەيتىندەي بولىپ كورىنىپ ەدى. ءتىپتى تىعىرىقتان شىعاتىن جول تابا الماي، تۇلا بويىڭدى قورقىنىش بيلەگەن كەزدەر دە بولدى. ءبىزدىڭ فيلم سول كەزدەردى ەسكە ءتۇسىرۋ ءۇشىن ارنايى ءتۇسىرىلدى", - دەيدى رەجيسسەر فارحات ءشارىپوۆ.
قازىر رەجيسسەر "ۇلتتىق كينونى قولداۋ مەملەكەتتىك ورتالىعى" كەاق تاپسىرىسى بويىنشا "حاردكور" اتتى جاڭا فيلم تۇسىرۋدە. بۇل فيلمدە ناشاقورلىق تاقىرىبى قوزعالادى.
"ادىرنا" ۇلتتىق پورتالى.
